दिनेशकुमार ऐतवडे

dinkar patil news : सत्तेची साखळी की संघर्षाचा धूर? सांगलीवाडीच्या राजकारणात नवा रंग: नदीच्या पलीकडील परिसरात वसलेली, राजकीय दृष्टिकोनातून अत्यंत महत्वाची अशी सांगली महापालिकेतील सांगलीवाडी – हा भाग आज पुन्हा एकदा चर्चेच्या केंद्रस्थानी आला आहे. ही वाडी केवळ भूगोलिकदृष्ट्या महत्त्वाची नाही, तर ती सांगलीच्या राजकीय नकाशावर आपले ठसठशीत स्थान राखून आहे. याच मातीने एकेकाळी दिनकर पाटील यांना आमदारकीच्या रूपात विधानसभेपर्यंत पोहोचवले. त्यांच्या राजकीय कारकीर्दीचा उदय आणि उत्थान दोन्ही या वाडीतून घडले, त्यामुळे सांगलीवाडी ही त्यांच्यासाठी केवळ मतदारसंघ नव्हे, तर आपल्या कार्याचा गाभा ठरली.

dinkar patil news : सत्तेची साखळी की संघर्षाचा धूर? सांगलीवाडीच्या राजकारणात नवा रंग

पण सत्तेच्या मार्गावरून वाटचाल करताना अनेकदा आपल्या घरातीलच माणसे दूर जातात आणि काही वेळा विरोधात उभी ठाकतात. असाच काहीसा प्रवास दिनकर पाटील आणि दादा घराण्याच्या संघर्षातून घडला. 2004 साली मदन पाटील यांच्या बंडखोरीने या संघर्षाने टोक गाठले. या संघर्षाने केवळ दोन राजकीय नेत्यांमध्ये मतभेद निर्माण केले नाहीत, तर संपूर्ण सांगलीवाडीचे राजकारण दोन तटांमध्ये विभागले गेले.

तथापि, राजकारणात कोणतेही दार कायमचे बंद राहत नाही. काळ बदलतो, आणि त्याचबरोबर नातीही नव्याने जुळू लागतात. अलीकडेच भाजपमध्ये प्रवेश केलेल्या जयश्री पाटील यांनी या राजकीय समीकरणात एक नव्या आशेचा किरण उजळवला आहे. त्यांनी प्रवेश करताच सांगलीवाडीत एक चर्चा पुन्हा उफाळून आली आहे – जयश्रीताई आणि दिनकर पाटील यांचे मनोमिलन खरोखरच होणार का?

हेही आवर्जुन वाचा

जयश्रीताईंच्या प्रवेशामुळे अनेक प्रभागात होणार भाजपची गोची

ही चर्चा केवळ व्यक्तिगत मनोमिलनाच्या मर्यादेत राहिलेली नाही, तर भाजपच्या आगामी गणितांवर त्याचा मोठा परिणाम होणार आहे. जयश्री पाटील यांच्या खंद्या समर्थकांमध्ये गणले जाणारे उदय पाटील हेही महापालिकेच्या रणधुमाळीत उतरण्याच्या तयारीत आहेत. दुसरीकडे, दिनकर पाटील यांचे सुपुत्र अजिंक्य पाटील हेही राजकीय पटलावर आपले स्थान मजबूत करण्याच्या तयारीत आहेत. त्यामुळे उमेदवारीच्या समीकरणात उदय पाटील की अजिंक्य पाटील? हा सवाल आता भाजपसमोर मोठ्या पेचप्रसंगासारखा उभा ठाकला आहे.

dinkar-patil-news-chain-of-power-or-smoke-of-conflict-new-color-in-sangliwadi-politics

या सार्‍या घडामोडींच्या पार्श्वभूमीवर प्रश्न उभा राहतो या नेत्यांमध्ये समेट होणार का? केवळ एकच पक्ष हे समानधर्म म्हणून पुरेसे ठरणार का? की पुन्हा एकदा वर्चस्वाची लढाई, मतांची भूक, आणि स्थानिक गटबाजी या सार्‍याचा गंध भाजपच्या अंतर्गत राजकारणात दरवळेल?

राजकारणात स्थायित्वाच्या पलीकडेही काही घडते – याचे उत्तर सांगलीवाडीच्या रस्त्यांवर, चौकांमध्ये, आणि त्या गल्ल्यांमधून फिरणार्‍या मतांच्या हवेच्या लाटांमध्ये सापडेल. सध्या तरी इतकेच म्हणता येईल – सांगलीवाडी पुन्हा एकदा राजकीय नाट्याचे रंगमंच बनणार आहे, आणि या रंगमंचावरचा ’मनोमिलन’ हा पडद्यामागचा सस्पेन्स ठरणार आहे.

Author: Rajkiya Live

दिनेशकुमार ऐतवडे रा. समडोली ता. मिरज जि. सांगली हे गेल्या 25 वर्षांपासून पत्रकारिता क्षेत्रात आहेत. Bsc झाल्यानंतर शांतीनिकेतन मधून पत्रकारितेची पदवी घेतली. 1999 मध्ये त्यांनी लोकमत मधून आपल्या कामाला सुरुवात केली. त्यानंतर 1 एप्रिल 2000 ते 20 jully 2020 परेंत तरुण भारत च्या सांगली आवृत्ती मध्ये उपसंपादक पदावर काम केले. सध्या ते दैनिक जनप्रवास मध्ये उपसंपादक म्हणून काम करीत आहेत. राजकारण हा त्यांच्या मुख्य विषय आहे. सांगली, कोल्हापूर, आणि हातकणंगले लोकसभा मतदार संघावर त्यांनी भरपूर लिखाण केले आहे.