sangli crime news : कवठेपिरानमध्ये जमिनीच्या वादातून चुलता आणि पुतण्यावर खुनी हल्ला : सांगली : मिरज तालुक्यातील कवठेपिरान गावामध्ये भावाभावांमध्ये सुरु असलेल्या जमिनीच्या वादातून पुतण्या आणि भावाला चाकूने भोसकून खुनाचा प्रयत्न केल्याची धक्कादायक घटना घडली.

sangli crime news : कवठेपिरानमध्ये जमिनीच्या वादातून चुलता आणि पुतण्यावर खुनी हल्ला

सदर खुनी हल्ल्याची घटना शनिवार 05 एप्रिल रोजी रात्री दहा वाजण्याच्या सुमारास घडली. या हल्ल्यात प्रशांत विष्णू देसाई (वय 35) आणि विष्णू शिवा देसाई (वय 65 दोघे रा. कवठेपिरान) हे गंभीर जखमी झाले असून, त्यांच्यावर सांगलीतील खासगी रुग्णालयात उपचार सुरु आहेत. या प्रकरणी जखमी प्रशांत देसाई याने सांगली ग्रामीण पोलीस ठाण्यात फिर्याद दिली आहे. त्याच्या फिर्यादीवरून पोलिसांनी हल्ला करणार्‍या अभिजित उत्तम देसाई (वय 28), उत्तम शिवा देसाई (वय 58) आणि अमोल शिवा देसाई (वय 45 रा. देसाई गल्ली, कवठेपिरान) या तिघांवर खुनाचा प्रयत्न केल्याचा गुन्हा दाखल करत अटक केली आहे.

याबाबत अधिक माहिती अशी की, जखमी प्रशांत देसाई हा आपल्या कुटुंबियांसह मिरज तालुक्यातील कवठेपिरान गावामध्ये राहतो. प्रशांत देसाई आणि त्यांच्या चुलत्यांमध्ये वडिलोपार्जित शेतजमिनीच्या वाटणीवरून वाद आहेत. शनिवारी रात्री दहा वाजण्याच्या सुमारास प्रशांत हा त्यांचे वडील विष्णू देसाई हे दोघेजण संशयित तिघांना घेऊन चुलत भाऊ अरविंद देसाई याच्या घरी वाद मिटवण्यासाठी बैठक घेण्यासाठी निघाले होते. यावेळी संशयित अभिजित देसाई याने सारखे सारखे या विषयावर कितीवेळा मीटिंगला बसायचे असे म्हणून जखमी प्रशांत आणि त्यांच्या वडिलांशी वाद घालू लागला.

यावेळी चुलते उत्तम देसाई आणि अमोल देसाई हे देखील वाद घालू लागले. याच वेळी संशयित अभिजित देसाई याने त्याच्या जवळील चाकूने प्रशांत याच्या कमरेखाली भोसकले. यानंतर संशयित उत्तम आणि अमोल देसाई यांनी त्यांच्या जवळ असणार्‍या चाकूने प्रशांत यांचे वडील विष्णू यांच्या पोटात भोसकून दोघांना गंभीर जखमी केले. घडलेल्या या घटनेनंतर जखमींना तातडीने सांगलीतील एका खाजगी रुग्णालयात उपचारासाठी दाखल केले. घटनेची माहिती मिळताच शहर विभागाच्या उपअधीक्षका विमला एम, पोलीस निरीक्षक किरण चौगले यांनी घटनास्थळी भेट देऊन तातडीने तपासाची चक्रे फिरवून संशयित तिघांना अटक केली.

Author: Rajkiya Live

दिनेशकुमार ऐतवडे रा. समडोली ता. मिरज जि. सांगली हे गेल्या 25 वर्षांपासून पत्रकारिता क्षेत्रात आहेत. Bsc झाल्यानंतर शांतीनिकेतन मधून पत्रकारितेची पदवी घेतली. 1999 मध्ये त्यांनी लोकमत मधून आपल्या कामाला सुरुवात केली. त्यानंतर 1 एप्रिल 2000 ते 20 jully 2020 परेंत तरुण भारत च्या सांगली आवृत्ती मध्ये उपसंपादक पदावर काम केले. सध्या ते दैनिक जनप्रवास मध्ये उपसंपादक म्हणून काम करीत आहेत. राजकारण हा त्यांच्या मुख्य विषय आहे. सांगली, कोल्हापूर, आणि हातकणंगले लोकसभा मतदार संघावर त्यांनी भरपूर लिखाण केले आहे.