संजयकाका पाटील, चंद्रहार पाटील, विशाल पाटील, धैर्यशिल माने, सत्यजित पाटील, राजू शेट्टी, डी. सी. पाटील यांचे भवितव्य ठरणार, प्रशासकीय यंत्रणा सज्ज, मतदान केंद्रावर पोलीस बंदोबस्त

जनप्रवास । प्रतिनिधी
सांगली, हातकणंगलेसाठी आज मतदान : सांगली ः राज्याचे लक्ष लागलेल्या सांगली आणि हातकणंगले लोकसभा मतदार संघासाठी मंगळवारी (दि. 7) मतदान होत आहे. सकाळी सात वाजल्यापासून 2 हजार 448 मतदान केंद्रावर जिल्ह्यातील 24 लाख 68 हजार 174 मतदार मतदानाचा हक्क बजावतील. जिल्ह्यातील इस्लामपूर आणि शिराळा हे दोन विधानसभा मतदारसंघ हातकणंगले लोकसभा मतदारसंघात समाविष्ट आहेत. मतदानासाठी प्रशासकीय यंत्रणा सज्ज झाली असून मतदान केंद्रावर अनुचित प्रकार घडू नये, यासाठी चोख पोलिस बंदोबस्त ठेवण्यात आला आहे.

सांगली, हातकणंगलेसाठी आज मतदान

सांगली लोकसभेसाठी 20 उमेदवार रिंगणात आहेत. सांगलीत भाजपचे संजयकाका पाटील, महाविकास आघाडीचे चंद्रहार पाटील, अपक्ष विशाल पाटील तर हातकणंगलेत महायुतीचे धैर्यशिल माने, शिवसेनेचे सत्यजित पाटील आणि स्वाभिमानीचे राजू शेट्टी यांची प्रतिष्ठा पणाला लागली आहे.

रविवारी सायंकाळी प्रचार तोफा थंडावल्या.

मागील पंधरा दिवसांपासून लोकसभा निवडणुकीच्या प्रचारासाठी आरोप-प्रत्यारोपांच्या फैरी झडल्यानंतर रविवारी सायंकाळी प्रचार तोफा थंडावल्या. प्रत्यक्षात प्रचार थांबला असला तरी मतदानासाठी शेवटची रात्र असल्याने कार्यकर्ते मतदारांपर्यंत पोहोचण्याचा प्रयत्न करीत होते. लोकसभा मतदार संघासाठी आज सकाळी सात ते सायंकाळी सहा या वेळेत मतदान होणार आहे. जिल्ह्यातील 18 लाख 68 हजार 174 मतदार सांगलीचा खासदार ठरवतील.

व्होटर स्लीपचे वाटप पूर्ण झाल्याचा दावा प्रशासनाने केला आहे

हातकणंगले मतदारसंघात इस्लामपूर विधानसभेसाठी 2 लाख 71 हजार 425 आणि शिराळा विधानसभेसाठी 2 लाख 97 हजार 221 मतदार आहेत. मतदानासाठी दिव्यांग मतदार, ज्येष्ठ नागरिक, गर्भवती महिला, चालता न येणारे रुग्ण यांचा मतदानात सहभाग सुलभ व्हावा, यासाठी प्रशासनाने विविध सुविधा पुरविण्यात आल्या आहेत. व्होटर स्लीपचे वाटप पूर्ण झाल्याचा दावा प्रशासनाने केला आहे. कोणताही अनुचित प्रकार होऊ नये यासाठी पुरेसा पोलीस बंदोबस्त तैनात करण्यात आला आहे.

मतदारांपर्यंत पोहोचण्याचा शेवटपर्यंत प्रयत्न

जाहिर प्रचार संपला असला तरी रात्री गुप्त प्रचार सुरुच राहिला. मतदानादिवशीसाठी उमेदवारांची बुथ लावणे, निवडणूक चिन्ह मतदारांपर्यंत पोहोचवण्याचा प्रयत्न शेवटच्या क्षणापर्यंत सुरू असल्याचे चित्र होते. जिल्ह्यात भाजप, महाविकास आघाडी, अपक्ष उमेदवाराच्या प्रचारार्थ विविध नेत्यांच्या प्रचार सभांचा धुरळा उडाला. आरोप-प्रत्यारोप, टोले-कोपरखळ्या मारत नेत्यांचे शाब्दिक युद्ध सुरु होते. राजकीय टीका ते व्यक्तिगत हेवेदावे असा आगळावेगळा रंग यंदाच्या प्रचारात भरला. मोटारसायकल रॅली, पदयात्रांची रेलचेलच होती. बाजार, जत्रा, यात्रा ही तर प्रचाराची प्रमुख केंद्रेच बनली.

संजयकाका, चंद्रहार आणि विशाल यांच्यात जोरदार टशन

सांगली मतदारसंघात भाजपाचे उमेदवार संजयकाका पाटील, अपक्ष विशाल पाटील, महाविकास आघाडीचे उमेदवार चंद्रहार यांच्यात चुरशीने लढत होत आहे. प्रचारार्थ विविध नेत्यांनी प्रचाराचे रान उठवले. प्रचार सांगते दिवशी शेवटच्या दिवशी भाजपकडून केंद्रिय मंत्री नितीन गडकरी, महाविकास आघाडीच्या प्रचार सांगतेसाठी शिवसेना युवा सेनेचे प्रमुख आदित्य ठाकरे तर विशाल पाटील यांच्यासाठी बहुजन वंचित आघाडीचे अ‍ॅड प्रकाश आंबेडकर यांची सभा झाली.
दिग्गज नेत्यांनी गाजवल्या सभा

भाजप महायुतीच्या प्रचारासाठी मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजित पवार, गृहमंत्री अमित शहा, केंद्रिय अर्थराज्यमंत्री भागवत कराड, उच्चतंत्र शिक्षण मंत्री चंद्रकांतदादा पाटील, माजी मंत्री सदाभाऊ खोत यांच्या प्रचार सभा झाल्या. महाविकास आघाडीच्या प्रचारासाठी शिवसेना पक्षप्रमुख व माजी मुख्यमंत्री उद्धव ठाकरे, राष्ट्रवादीचे प्रदेशाध्यक्ष जयंत पाटील, आ. विश्वजीत कदम यांच्या सभा झाल्या. अन्य उमेदवारांचा प्रचार संथ गतीने पण नेटाने प्रचार झाला.

हातकणंगलेत 27 उमेदवार नशीब आजमावणार

दुसरीकडे जिल्ह्यातील इस्लामपूर आणि शिराळा हे दोन मतदारसंघ हातकणंगले लोकसभा मतदारसंघात समाविष्ट आहेत. हातकणंगले मतदारसंघात 27 उमेदवार निवडणुकीच्या रिंगणात नशीब आजमावत आहेत. शिवसेनेचे विद्यमान खासदार धैर्यशील माने, महाविकास आघाडीचे सत्यजित पाटील आणि स्वाभिमानी शेतकरी संघटनेचे राजू शेट्टी यांच्यात चुरशीची लढत होत आहे. या मतदारसंघातील 18 लाख मतदार हातकणंगलेचा खासदार ठरवणार आहेत.

सांगली लोकसभेचे प्रमुख उमेदवार
1. संजय रामचंद्र पाटील (भाजप)
2 चंद्रहार सुभाष पाटील (शिवसेना)
3. विशाल प्रकाशराव पाटील (अपक्ष)
4. सिकंदर पटवेगार (बहुजन समाज पार्टी)
5 आनंद शंकर नलगे (बळीराजा पार्टी),
6. महेश यशवंत खराडे (स्वाभिमानी पक्ष)

हातकणंगले मतदारसंघातील प्रमुख उमेदवार
1 धैर्यशिल संभाजीराव माने (शिवसेना)
2. सत्यजित बाबासाहेब पाटील (शिवसेना ठाकरे गट)
3. राजू शेट्टी (स्वाभिमानी पक्ष)
4. डी. सी. पाटील (वंचित आघाडी)
5. रघुनाथदादा पाटील (शेतकरी संघटना)

Author: Rajkiya Live

दिनेशकुमार ऐतवडे रा. समडोली ता. मिरज जि. सांगली हे गेल्या 25 वर्षांपासून पत्रकारिता क्षेत्रात आहेत. Bsc झाल्यानंतर शांतीनिकेतन मधून पत्रकारितेची पदवी घेतली. 1999 मध्ये त्यांनी लोकमत मधून आपल्या कामाला सुरुवात केली. त्यानंतर 1 एप्रिल 2000 ते 20 jully 2020 परेंत तरुण भारत च्या सांगली आवृत्ती मध्ये उपसंपादक पदावर काम केले. सध्या ते दैनिक जनप्रवास मध्ये उपसंपादक म्हणून काम करीत आहेत. राजकारण हा त्यांच्या मुख्य विषय आहे. सांगली, कोल्हापूर, आणि हातकणंगले लोकसभा मतदार संघावर त्यांनी भरपूर लिखाण केले आहे.