जनप्रवास । सांगली
सांगली लोकसभा मतदारसंघात काँग्रेसचे दोन आमदार आहेत, शिवसेनेची (उबाठा) ताकद कमी आहे. तरी देखील ते जागा का मागतात हे कळत नाही. पण ही जागा काँग्रेसची आहे. ती मिळणार, उमेदवार विशाल पाटील निवडून देखील येणार. जागा वाटपात पक्षाने ही जागा जर शिवसेनेला सोडली तर 2009 मध्ये जत विधानसभा मतदारसंघात काँग्रेस विसर्जित करून जो पॅटर्न राबविला होता. तोच पॅटर्न सांगली लोकसभेला राबवू, असा सज्जड इशारा काँग्रेसचे जिल्हाध्यक्ष विक्रमसिंह सावंत यांनी पत्रकार बैठकीत दिला.

SANGLI LOKSABHA …अन्यथा 2009 चा जत पॅटर्न सांगली लोकसभेला राबवू: आ. विक्रमसिंह सावंत

जागा काँग्रेसचीच: विशाल पाटील निवडून येणार

सांगली जिल्हा काँग्रेसच्या नूतन पदाधिकार्‍यांची निवड येथील काँग्रेस भवनमध्ये पार पडल्या. यावेळी काँग्रेसच्या प्रमुख पदाधिकार्‍यांची बैठक देखील झाली. या बैठकीनंतर आ. विक्रमसिंह सावंत पत्रकारांशी बोलत होते. ते म्हणाले, सांगली लोकसभेच्या जागेवरून अनेक चर्चा सुरू आहेत. पण या चर्चात तथ्य नाही. सांगली लोकसभेची जागा काँग्रेस पक्षाचीच आहे. काँग्रेसकडून विशाल पाटील यांची उमेदवारी निश्चित आहे. या निवडणुकीत विशाल पाटील निवडून येतील आणि शंभर टक्के खासदार होतील, यात काही शंका नाही. मुंबईत नुकतीच बैठक झाली.

शिवसेनेने (उबाठा) सांगलीची जागा मागितली असल्याचे काँग्रेसच्या वरिष्ठ नेत्यांनी सांगितले, पण ही जागा देण्यास नकार देण्यात आला आहे.

या मतदारसंघात काँग्रेसचे दोन आमदार आहेत. या उलट शिवसेनेची ताकद कमी आहे. आयात करून घेतलेले उमेदवार या मतदारसंघात लोक स्वीकारणार नसल्याचे आ. सावंत यांनी स्पष्ट केले. त्यामुळे काँग्रेसच्या हात चिन्हावरच विशाल पाटील निवडणूक लढतील, आणि ते निवडून येतील, असा विश्वास व्यक्त केला. महाविकास आघाडीच्या जागा वाटपात जर ही जागा शिवसेनेला (उबाठा) ला सोडली तर 2009 मध्ये जत विधानसभा मतदारसंघात जो पॅटर्न राबवला होता, तोच पॅटर्न काँग्रेस विसर्जित करून राबवू, असा इशारा देखील आ. सावंत यांनी दिला.

काय आहे जत विधानसभा पॅटर्न…

2009 च्या विधानसभा निवडणुकीत काँग्रेस-राष्ट्रवादीची आघाडी होती. या निवडणुकीत काँग्रेसने जत मतदारसंघावर दावा केला होता. पण आघाडीच्या जागा वाटपात ही जागा राष्ट्रवादीला सुटली. राष्ट्रवादीने माजी आमदार विलासराव जगताप यांना उमेदवारी दिली. पण नाराज झालेल्या काँग्रेसच्या पदाधिकार्‍यांनी जत तालुक्यातील काँग्रेस विसर्जित केली, सर्वांनी राजीनामे दिले. आणि उघडपणे भाजपचे प्रकाश शेंडगे यांचा प्रचार केला. या निवडणुकीत आघाडीला धक्का बसला आणि भाजपचे प्रकाश शेंडगे 4 हजार 600 मतांनी विजयी झाले होते.

Author: Rajkiya Live

दिनेशकुमार ऐतवडे रा. समडोली ता. मिरज जि. सांगली हे गेल्या 25 वर्षांपासून पत्रकारिता क्षेत्रात आहेत. Bsc झाल्यानंतर शांतीनिकेतन मधून पत्रकारितेची पदवी घेतली. 1999 मध्ये त्यांनी लोकमत मधून आपल्या कामाला सुरुवात केली. त्यानंतर 1 एप्रिल 2000 ते 20 jully 2020 परेंत तरुण भारत च्या सांगली आवृत्ती मध्ये उपसंपादक पदावर काम केले. सध्या ते दैनिक जनप्रवास मध्ये उपसंपादक म्हणून काम करीत आहेत. राजकारण हा त्यांच्या मुख्य विषय आहे. सांगली, कोल्हापूर, आणि हातकणंगले लोकसभा मतदार संघावर त्यांनी भरपूर लिखाण केले आहे.