जनप्रवास । प्रतिनिधी
SANGLI LOKSABHA : राऊतांच्या प्रमाणपत्राची गरज नाही : संजय पाटील : सांगली ः लोकसभेच्या दोन टर्ममध्ये केलेल्या कामांवरच पक्षाने मला उमेदवारी दिली आहे. त्यामुळे शिवसेनेचे खासदार संजय राऊत यांच्या प्रमाणपत्राची गरज नसल्याची टीका खासदार संजयकाका पाटील यांनी केली. 18 एप्रिलला उपमुख्यमंत्री देवेंद्र फडणवीस आणि प्रदेशाध्यक्ष चंद्रशेखर बावनकुळे यांच्या उपस्थितीत उमेदवारी अर्ज दाखल करणार असल्याचेही त्यांनी सांगितले.
SANGLI LOKSABHA : राऊतांच्या प्रमाणपत्राची गरज नाही : संजय पाटील
फडणवीस, बावनकुळेंच्या उपस्थितीत 18 रोजी अर्ज भरणार
खा. पाटील म्हणाले, भाजप नेत्यांनी तिसर्‍यांदा माझ्यावर विश्वास दाखविला आहे. दुसर्‍या यादीतच माझी उमेदवारी जाहीर झाली आहे. मी निवडणुकीपुरतीच धामधूम करायची माझी प्रवृत्ती नाही. सातत्याने लोकांच्या संपर्कात राहिल्याने मला कोणतीही धावपळ करण्याची गरज नाही. राऊतांनी सांगलीत येवून इथं येवून सलोख्याने प्रश्न सोडवायला हवे होते, मात्र त्यांनी जी भाषा वापरली, ती डिवचण्याची होती. त्यामुळे त्यांचा प्रश्न सुटेल, असे वाटत नाही.
संजय राऊत हे ठाकरे गटाचे प्रमुख नेते आहेत. राज्यस्तरावर काम करताना भान ठेवून बोलावे लागते. उचलली जीभ लावली टाळ्याला या भाषा सगळ्यांना करता येतात. जिल्ह्यात आल्यानंतर माझ्या कामाचे प्रगतीपुस्तक वाचले असते तर त्यांचे बोलायचे धाडस झाले नसते. राजकारणाची भाषा वापरण्यासाठी ते आले होते. मैदान सुरु झाल्यानंतर राऊतांना सगळ्या प्रश्नांची उत्तरे पुराव्यासह दिली जातील. माझ्या कामाचे मूल्यमापन करतात, तो माझा पक्ष आणि जनता आहे. माझे मूल्यमापन करण्यापेक्षा त्यांच्या पक्षातील नेत्यांचे मूल्यमापन करावे, असे प्रत्त्युत्तर दिले.
ताकारी, म्हैसाळ सिंचन योजनेसाठी चाकोरीच्या बाहेर जावून पैसे आणले. कृष्णा खोरे महामंडळाचे अध्यक्ष असताना केंद्र सरकारने मोठी मदत केली. या निधीमुळे सांगली जिल्ह्यासह सातारा आणि सांगोला तालुक्यातील गावांना पाणी देता आले. लोकसभेसाठी सलग तिसर्‍यांदा 18 एप्रिल रोजी उपमुख्यमंत्री देवेंद्र फडणवीस आणि प्रदेशाध्यक्ष बावनकुळे यांच्या उपस्थितीत उमेदवारी अर्ज दाखल करणार असल्याचे खा. पाटील यांनी सांगितले.
नरेंद्र मोदींची सांगलीत महिनाअखेरीस सभा
निवडणुकीसाठी अर्ज दाखल केल्यानंतर खर्‍या अर्थाने प्रचाराला सुरुवात होणार आहे. माझा उमेदवारी अर्ज भरण्यासाठी उपमुख्यमंत्री देवेंद्र फडणवीस आणि प्रदेशाध्यक्ष बावनकुळे येणार आहेत. त्यानंतर सांगली आणि हातकणंगले लोकसभा मतदारसंघाच्या संयुक्त प्रचारासाठी एप्रिलअखेरीस सांगलीत जाहीर सभा होणार असल्याचे खा. संजयकाका पाटील यांनी सांगितले.
Author: Rajkiya Live
दिनेशकुमार ऐतवडे रा. समडोली ता. मिरज जि. सांगली हे गेल्या 25 वर्षांपासून पत्रकारिता क्षेत्रात आहेत. Bsc झाल्यानंतर शांतीनिकेतन मधून पत्रकारितेची पदवी घेतली. 1999 मध्ये त्यांनी लोकमत मधून आपल्या कामाला सुरुवात केली. त्यानंतर 1 एप्रिल 2000 ते 20 jully 2020 परेंत तरुण भारत च्या सांगली आवृत्ती मध्ये उपसंपादक पदावर काम केले. सध्या ते दैनिक जनप्रवास मध्ये उपसंपादक म्हणून काम करीत आहेत. राजकारण हा त्यांच्या मुख्य विषय आहे. सांगली, कोल्हापूर, आणि हातकणंगले लोकसभा मतदार संघावर त्यांनी भरपूर लिखाण केले आहे.
