जनप्रवास । अनिल कदम
SANGLI LOKSABHA : विरोधकांचे ठरेना, भाजपमध्ये जमेना :सांगली ः सांगली लोकसभा मतदारसंघातील वाद शमताना दिसत नाही. महाविकास आघाडीत उमेदवारीवरुन वाद सुरु असताना शिवसेनेने चंद्रहार पाटील यांची उमेदवारी जाहीर केली. त्यामुळे काँग्रेस नाराजी दर्शवित मैत्रीपूर्ण लढतीचा इशारा दिला. मताचा गठ्ठा विरोधात जाण्याची शक्यता असल्याने शिवसेनेची कोंडी झाली आहे. दुसरीकडे भाजपकडून दुसर्‍या यादीतच खा. संजयकाका पाटील यांना उमेदवारी जाहीर केली. मात्र पक्षांतर्गत सुरु असलेला वाद अद्याप थांबलेला नाही. त्यामुळे सांगली मतदारसंघात विरोधकांचे ठरेना, भाजपमध्ये जमेना अशी अवस्था असल्याचे चित्र दिसते.

SANGLI LOKSABHA : विरोधकांचे ठरेना, भाजपमध्ये जमेना

काँग्रेसच्या इशार्‍याने शिवसेनेची कोंडी

लोकसभा निवडणूक 16 मार्चला जाहीर झाली. त्यानंतर राजकीय हालचाली गतीमान झाल्या आहेत. सांगली लोकसभेच्या जागेवरुन गेल्या पंधरा दिवसांपासून शिवेसना व काँग्रेसमध्ये रस्सीखेच सुरू झाली आहे. शिवसेनेचे उध्दव ठाकरे व संजय राऊत यांनी डबल महाराष्ट्र केसरी चंद्रहार पाटील यांना शिवसेनेत पक्षपवेश देऊन उमेदवारी जाहीर केली होती. यावेळी काँग्रेसने नाराजी व्यक्त केली होती. आ. विश्वजीत कदम यांच्या नेतृत्वाखाली जिल्ह्यातील नेत्यांनी प्रदेश व केंद्रीय पातळीवरील नेत्यांची भेट घेऊन काँग्रेसला उमेदवारी देण्याची मागणी केली. शिवाय कोणत्याही परिस्थितीत ही जागा सोडणार नसल्याचा इशारा दिला होता.

महाविकास आघाडीच्या बैठकीतही सांगलीचा विषय चांगलाच गाजला.

मात्र तोडगा निघाला नाही, त्यानंतरही उध्दव ठाकरे यांनी शिवसेनेच्या यादीतून चंद्रहार पाटील यांची उमेदवारी घोषित केली. याविरोधात काँग्रेस नेत्यांनी आक्रमक होत दिल्ली गाठली. तेथेही तोडगा निघालेला नाही, त्यामुळे काँग्रेसने मैत्रीपूर्ण लढतीचा आग्रह धरला आहे. जिल्ह्यात शिवेसेनेची ताकद नसताना लोकसभेची उमेदवारी घेत काँग्रेसला डिवचले आहे. ना आमदार, ना जिल्हा परिषद, पंचायत समिती सदस्य नाही. कोणतीही ग्रामपंचायत नाही. स्थानिक स्वराज्य संस्थेमध्ये पदाधिकारी आणि सदस्य नसतानाही जागा खेचली आहे. मात्र काँग्रेसचा आक्रमकपणा कायम असल्याने शिवसेनेची कोंडी झाली आहे.

काँग्रेसने मैत्रीपूर्ण लढत केलीच तर सेनेला म्हणावे तितके सोपे नाही.

प्रचारयंत्रणा राबविणेही मुश्किल बनणार आहे. मात्र शरदचंद्र पवार राष्ट्रवादीची साथ मिळू शकते. या पार्श्वभूमीवर शिवसेना सचिव वरुण सरदेसाई आणि संपर्कप्रमुख नितीन बानुगडे-पाटील हे जिल्ह्यातील सेनेच्या नेत्यांशी सातत्याने संपर्क साधत आहेत. महाविकास आघाडीत काय चर्चा सुरु आहे, याकडे तुम्ही लक्ष देवू नका. संयमाने वागा. प्रचाराचा वेग वाढवा. काही दिवसांत महाविकास आघाडीतील सर्व पक्ष आपल्यासोबत उभे असतील. काँग्रेसमधील नाराजी दोन दिवसांत संपेल, असे सांगून गेले. परंतु जिल्ह्यात पकड नसताना शिवसेनेचा खासदार करण्याचे स्वप्नच राहणार का? अशी चर्चा सुरु झाली आहे.

विरोधकांमध्ये गैरमेळ असताना भाजपमध्येही सर्वकाही ठिकठाक नाही.

भाजप नेत्यांमध्ये अंतर्गत संघर्ष आहे. माजी जिल्हाध्यक्ष पृथ्वीराज देशमुखांनी उमेदवारी मागितली होती, याशिवाय खासदार संजयकाका पाटील यांना उमेदवारी देऊ नये, अशी मागणी भाजपमधील काही नेते व पदाधिकार्‍यांची होती. मात्र पक्षाकडून पुन्हा संजयकाका पाटील यांना तिसर्‍यांदा उमेदवारी देत भाजपने धक्का दिला. पक्षांतर्गत विरोध डावलून दिल्लीतील पक्षश्रेष्ठींनी त्यांच्या नावाची घोषणा केली. यामुळे भाजपमध्ये नाराजी आहे.

कोण काय म्हणतंय याकडे दुर्लक्ष करीत खासदार पाटील यांनी प्रचाराला सुरुवात केली आहे. अद्याप महायुतीतील घटक पक्षही खासदारांच्या प्रचारात सहभागी झालेले नाहीत. त्यामुळे भाजपमध्ये मानापमान नाट्य कायम असून पक्षांतील नेत्यांमध्ये सूर जमलेला नसल्याचे दिसून येते.

Author: Rajkiya Live

दिनेशकुमार ऐतवडे रा. समडोली ता. मिरज जि. सांगली हे गेल्या 25 वर्षांपासून पत्रकारिता क्षेत्रात आहेत. Bsc झाल्यानंतर शांतीनिकेतन मधून पत्रकारितेची पदवी घेतली. 1999 मध्ये त्यांनी लोकमत मधून आपल्या कामाला सुरुवात केली. त्यानंतर 1 एप्रिल 2000 ते 20 jully 2020 परेंत तरुण भारत च्या सांगली आवृत्ती मध्ये उपसंपादक पदावर काम केले. सध्या ते दैनिक जनप्रवास मध्ये उपसंपादक म्हणून काम करीत आहेत. राजकारण हा त्यांच्या मुख्य विषय आहे. सांगली, कोल्हापूर, आणि हातकणंगले लोकसभा मतदार संघावर त्यांनी भरपूर लिखाण केले आहे.