आ. विश्वजीत कदम, खा. विशाल पाटील यांनी केली चर्चा

जनप्रवास । सांगली
sangli, miraj vidhansabha 2024 : काँग्रेसमध्ये सांगलीच्या जागेवरून घमासान: मिरजेचा वाद मिटणार: सांगली व मिरज विधानसभा मतदारसंघाच्या जागेवरून काँग्रेस अंतर्गत उमेदवारीवरून सुरू असलेला संघर्ष मिटविण्यासाठी काँग्रेसचे नेते आ. विश्वजीत कदम व खा. विशाल पाटील यांनी तब्बल चार तास बैठक घेतली. या बैठकीत सांगलीच्या जागेवरून घमासान झाले. दोन्ही गट लढण्यावर ठाम असल्याचे त्यांनी नेत्यांनी सांगितले. तर मिरज विधानसभेचा वाद मिटण्याची चिन्हे असून मोहन वनखंडे हे उमेदवार असल्याची शक्यता आहे.

sangli, miraj vidhansabha 2024 : काँग्रेसमध्ये सांगलीच्या जागेवरून घमासान: मिरजेचा वाद मिटणार

विधानसभा बिगुल वाजला आहे. महाविकास आघाडीच्या जागा वाटपात काँग्रेसला पलूस-कडेगाव, जत, सांगली मतदारसंघ मिळाले आहेत. तर मिरज देखील काँग्रेसच्या वाट्याला येण्याची दाट शक्यता आहे. पण सांगली व मिरज विधानसभा निवडणुकीत काँग्रेस इच्छुकांमध्ये जोरदार चुरस निर्माण झाली आहे. या पार्श्वभूमीवर काँग्रेसचे नेते आ. विश्वजीत कदम व खा. विशाल पाटील यांनी सांगली व मिरजेतील वाद मिटविण्यासाठी स्वतंत्र बैठका घेतल्या.

सांगली विधानसभा मतदारसंघातून पृथ्वीराज पाटील व जयश्रीताई पाटील इच्छूक आहेत. या दोन्ही नेत्यांच्या समर्थकांबरोबर आ. विश्वजीत कदम व खा. विशाल पाटील यांनी स्वतंत्र चर्चा केली. जयश्रीताई पाटील यांच्या समर्थकांनी गेल्या वेळी आम्ही थांबलो होतो, यावर्षी थांबणार नाही. पक्षाने उमेदवारी द्यावी, अशी मागणी केली. तर पृथ्वीराज पाटील समर्थकांनी गेल्या दहा वर्षात पक्षाचे काम केले आहे. या केलेल्या कामावर संधी मिळावी, अशी मागणी केली. त्यानंतर काँग्रेस नेत्यांनी दोन्ही समर्थकांची एकत्रित बैठक घेतली.

यावेळी दोघांच्या समर्थकांनी उमेदवारीचा दावा केला त्यामुळे जोरदार घमासान झाले. समर्थकांसमोर एकमत न झाल्याने आ. विश्वजीत कदम, खा. विशाल पाटील, पृथ्वीराज पाटील व जयश्रीताई पाटील, महेंद्र लाड, डॉ. जितेश कदम यांची एकत्रित बैठक पार पडली. मात्र तोडगा निघाला नाही.

तर मिरज विधानसभा मतदारसंघातून काँग्रेस पक्षाकडून सी. आर. सांगलीकर, मोहन वनखंडे, धनराज सातपुते यांच्यासह नऊ जणांनी पक्षाकडे उमेदवारी मागितली आहे. त्यांच्या समर्थकांबरोबर आ. कदम व खा. पाटील यांनी चर्चा केली. अनेकांनी लोकसभेच्या निवडणुकीत पक्षविरोधी प्रचार केलेले व भाजपकडून आयात केलेल्या व्यक्तिंना उमेदवारी देऊ नये, अशी मागणी केली. सांगलीकर यांच्या समर्थकांनी यावर्षी पक्षाची उमेदवारी मिळावी, अशी मागणी केली.

माजी नगरसेवक व काँग्रेसच्या पदाधिकार्‍यांनी पक्ष ज्याला उमेदवारी देईल, त्याला आम्ही निवडून आणू, अशी ग्वाही दिली. जो उमेदवार चांगली लढाई करू शकतो, अशा उमेदवाराला पक्ष उमेदवारी देईल, असे नेत्यांनी स्पष्ट करत अंतिम निर्णय हा राज्य व केंद्रीय पातळीवरील नेते मंडळी घेणार असल्याचे सांगितले. यावेळी मिरज काँग्रेसचे अध्यक्ष संजय मेंढे, माजी महापौर किशोर जामदार यांच्यासह माजी नगरसेवक व पदाधिकारी उपस्थित होते. या बैठकीत मोहन वनखंडे यांच्या उमेदवारीला ग्रीन सिग्नल दिल्याचे चित्र होते.

पक्षाला विजयाची खात्री; त्यालाच उमेदवारी…
मिरज विधानसभेतून इच्छूक असलेले सी. एस. सांगलीकर, धनराज सातपुते आदी इच्छुकांच्या समर्थकांनी काँग्रेस पक्षातील प्रामाणिक कार्यकर्त्याला संधी द्यावी, ज्यांनी लोकसभेला विरोधात काम केले. त्यांना उमेदवारी देऊ नये, अशी मागणी केली. मात्र पक्षाला विजयाची ज्या उमेदवारावर खात्री असेल त्याला उमेदवारी दिली जाईल, असे कॉँग्रेस नेत्यांनी सांगितले. सत्ताधारी विद्यमान आमदाराला लढण्यासाठी नाकीदम करेल, त्याचा विचार होईल, असे आ. विश्वजीत कदम यांनी स्पष्ट केले.

Author: Rajkiya Live

दिनेशकुमार ऐतवडे रा. समडोली ता. मिरज जि. सांगली हे गेल्या 25 वर्षांपासून पत्रकारिता क्षेत्रात आहेत. Bsc झाल्यानंतर शांतीनिकेतन मधून पत्रकारितेची पदवी घेतली. 1999 मध्ये त्यांनी लोकमत मधून आपल्या कामाला सुरुवात केली. त्यानंतर 1 एप्रिल 2000 ते 20 jully 2020 परेंत तरुण भारत च्या सांगली आवृत्ती मध्ये उपसंपादक पदावर काम केले. सध्या ते दैनिक जनप्रवास मध्ये उपसंपादक म्हणून काम करीत आहेत. राजकारण हा त्यांच्या मुख्य विषय आहे. सांगली, कोल्हापूर, आणि हातकणंगले लोकसभा मतदार संघावर त्यांनी भरपूर लिखाण केले आहे.