sangli mahapalika news : मनपाची सीमकार्ड बंद अन् मृतदेहाची तीन तास हेळसांड : महापालिकेची सीमकार्ड बंद असल्याच्या फटका आता नागरिकांना बसू लागला आहे. गवळी गल्लीतील एका तरूणाने आत्महत्या केली होती. या तरूणाचा मृतदेह अंत्यसंस्कारासाठी नेण्यासाठी मनपाच्या शववाहिकेला संपर्क करण्यात आला. मात्र सीमकार्ड बंद असल्याने व चालकांच्या ड्युटी चेंजमुळे मृतदेहाची तब्बल तीन तास हेळसांड झाली. अखेर माजी नगरसेवक मंगेश चव्हाण यांनी शववाहिका व त्यावरील चालकाला शोधून आणल्यानंतर मृतदेह अंत्यसंस्काराला नेण्यात आला.

sangli mahapalika news : मनपाची सीमकार्ड बंद अन् मृतदेहाची तीन तास हेळसांड

प्रशासनाने सीमकार्डबंद केल्याने नागरिकांना होतोय त्रास

महापालिकेचा प्रशासकीय कारभार गतीने व्हावा म्हणून मनपाचे पदाधिकारी, अधिकारी व खातेप्रमुखांना प्रशासनाच्यावतीने सीमकार्ड देण्यात आली होती. सुमारे दीडशे सीमकार्ड प्रशासनाने दिली होती. त्याचा प्रत्येकी दोनशे रूपयांचा बोजा मनपावर पडत होता. शिवाय अनेक पदाधिकारी, नगरसेवकांनी सीमकार्ड जमा केली नव्हती. त्याचा विनाकारण बोजा मनपावर पडत होता. त्यामुळे आयुक्त शुभम गुप्ता यांनी प्रशासकीय सीमकार्ड बंद केली आहेत. याचा फटका आता नागरिकांना बसू लागला आहे. गवळी येथील एका तरूणाचे शनिवारी सिव्हिल हॉस्पिटलमध्ये निधन झाले होते. त्यानंतर मृतदेहाचे शवविच्छेदन करण्यात आले. त्यानंतर मृतदेह घरी आणि तेथून अंत्यसंस्कारासाठी नेण्यात येणार होता.

त्यासाठी नागरिकांकडे असलेला शवावाहिकेचा नंबर डायल करण्यात आला. मात्र हा नंबर बंद होता.

अनेकांशी दूरध्वनीवरून व प्रत्यक्षात जाऊन संपर्क साधण्याचा प्रयत्न केला पण संपर्क होऊ शकला नाही. नातेवाईकांनी माजी नगरसेवक मंगेश चव्हाण यांच्याशी संपर्क साधला. चव्हाण यांनी तातडीने धाव मनपाकडे धाव घेतली. शववाहिका थांब्यावर जाऊन चौकशी केली. त्यावेळी संबंधित कर्मचार्‍याने शववाहिका चालकाला दूरध्वनी लावला. पण त्याचा देखील नंबर बंद होता. त्यानंतर दुसर्‍या चालकाला दूरध्वनी लावण्यात आला. पण त्याने माझी ड्युटी नसल्याचे सांगितले. त्यानंतर ड्युटी असलेल्या चालकाला शोधण्यात आले. पण त्याच्याकडे असलेले मनपाचे सीमकार्ड बंद असल्याने हा घोळ तीन तास चालला. तीन तासानंतर शववाहिका मिळाली. पण या प्रकरामुळे कुटुंबियांचे मात्र हाल झाले.

महापालिकेची सीमकार्ड बंद असल्याने हे प्रकार होत आहेत. अनेक नागरिकांची कामे देखील विस्कळीत झाले आहेत. अधिकारी, खातेप्रमुखांचे खासगी नंबर नागरिक, माजी नगरसेवकांकडे नाहीत. त्याचा परिणाम आता कामांवर होऊ लागला आहे. त्यामुळे सीमकार्ड पूर्वीप्रमाणे सुरू करावीत, अशी मागणी नागरिकांतून होऊ लागली आहे.

Author: Rajkiya Live

दिनेशकुमार ऐतवडे रा. समडोली ता. मिरज जि. सांगली हे गेल्या 25 वर्षांपासून पत्रकारिता क्षेत्रात आहेत. Bsc झाल्यानंतर शांतीनिकेतन मधून पत्रकारितेची पदवी घेतली. 1999 मध्ये त्यांनी लोकमत मधून आपल्या कामाला सुरुवात केली. त्यानंतर 1 एप्रिल 2000 ते 20 jully 2020 परेंत तरुण भारत च्या सांगली आवृत्ती मध्ये उपसंपादक पदावर काम केले. सध्या ते दैनिक जनप्रवास मध्ये उपसंपादक म्हणून काम करीत आहेत. राजकारण हा त्यांच्या मुख्य विषय आहे. सांगली, कोल्हापूर, आणि हातकणंगले लोकसभा मतदार संघावर त्यांनी भरपूर लिखाण केले आहे.