सांगली : पोलीस ठाण्यात आलेल्या तक्रारी अर्जावरून गुन्हा दाखल न करण्यासाठी 50 हजारांची लाच घेताना विश्रामबाग पोलीस ठाण्यातील एका महिला पोलिस हवालदारास लाचलुचपत प्रतिबंधक विभागाच्या पथकाने रंगेहाथ पकडले. सांगलीवाडी येथील डॉ. पतंगराव कदम महाविद्यालय परिसरात मंगळवारी रात्री उशिरा सांगलीच्या लाच लुचपत विभागाने कारवाई केली. मनीषा नितीन कोंगनोळीकर उर्फ भडेकर (वय 42) असे त्या लाचखोर महिला पोलिस कर्मचार्‍याचे नाव आहे. या कारवाईने जिल्हा पोलिस दलात खळबळ उडाली आहे. याबाबत सांगली शहर पोलिस ठाण्यात गुन्हा दाखल करण्यात आला आहे. आज न्यायालयापुढे हजार केले असता त्यांना एक दिवसांची पोलीस कोठडी सुनावली आहे.

sangli crime news : सांगलीत महिला पोलिस हवालदार 50 हजारांची लाच घेताना रंगेहाथ जेरबंद

याबाबत अधिक माहिती अशी की, तक्रारदार महीले विरोधात विश्रामबाग पोलीस ठाण्यात एक तक्रार अर्ज दाखल आहे. सदर तक्रार अर्जावरून यातील तक्रारदार यांच्याविरुद्ध विश्रामबाग पोलीस ठाण्यात फसवणुकीचा गुन्हा दाखल न करण्याकरिता व यातील तक्रारदार यांच्या विरुद्धच्या तक्रारी अर्जाच्या चौकशीमध्ये मदत करण्यासाठी संशयित महिला पोलिस मनीषा कोंगनोळीकर उर्फ भडेकर यांनी 50 हजारांच्या लाचेची मागणी केली होती.

यानंतर सांगलीच्या लाचलुचपत विभागाकडे तक्रारदारांनी तक्रार केली. मंगळवार दि. 17 डिसेंबर रोजी लाचलुचपतच्या पथकाने पंचा समक्ष केलेल्या पडताळणी कारवाईमध्ये 50 हजारांच्या लाचेची मागणी केल्याचे निष्पन्न झाले. यानंतर पथकाने तातडीने मंगळवारी रात्री साडे दहा वाजण्याच्या सुमारास सांगलीवाडी येथील डॉ. पतंगराव कदम महाविद्यालय परिसरात सापळा रचला. यावेळी तक्रारदार महिलेकडून महिला हवालदार यांनी 50 हजारांची रक्कम पंचा समक्ष स्वीकारली असता त्यांना रंगेहात पकडण्यात आले. यानंतर त्यांना ताब्यात घेत त्यांच्या विरोधात सांगली शहर पोलिस ठाण्यात गुन्हा दाखल करण्यात आला.

लाचलुचपत विभागाने एका महिला पोलिस कर्मचार्‍याला लाच घेताना पकडल्याने पोलीस दलात खळबळ उडाली होती. सदरची कारवाई पोलीस उपअधीक्षक उमेश दा. पाटील, पोलीस निरीक्षक विनायक भिलारे, किशोर कुमार खाडे, पोलिस अंमलदार सीमा माने, विना जाधव, प्रीतम चौगुले, अजित पाटील, धनंजय खाडे यांच्या पथकाने केली.

Author: Rajkiya Live

दिनेशकुमार ऐतवडे रा. समडोली ता. मिरज जि. सांगली हे गेल्या 25 वर्षांपासून पत्रकारिता क्षेत्रात आहेत. Bsc झाल्यानंतर शांतीनिकेतन मधून पत्रकारितेची पदवी घेतली. 1999 मध्ये त्यांनी लोकमत मधून आपल्या कामाला सुरुवात केली. त्यानंतर 1 एप्रिल 2000 ते 20 jully 2020 परेंत तरुण भारत च्या सांगली आवृत्ती मध्ये उपसंपादक पदावर काम केले. सध्या ते दैनिक जनप्रवास मध्ये उपसंपादक म्हणून काम करीत आहेत. राजकारण हा त्यांच्या मुख्य विषय आहे. सांगली, कोल्हापूर, आणि हातकणंगले लोकसभा मतदार संघावर त्यांनी भरपूर लिखाण केले आहे.