sangli news : सांगलीत काँग्रेसचे युवक पदाधिकारी, अनेक माजी नगरसेवक भाजपच्या संपर्कात महापालिकेच्या निवडणुकीपूर्वी विरोधी पक्ष असलेल्या काँग्रेसला धक्का देण्याची तयारी आता भाजपकडून सुरू आहे. सांगलीतील काँग्रेसचा एक युवक पदाधिकारी व तीन-चार माजी नगरसेवक भाजपमध्ये प्रवेश करण्याच्या तयारीत आहेत. त्यांनी भाजपच्या एका नेत्याची भेट देखील घेतली असल्याची चर्चा सुरू आहे. त्यामुळे निवडणुकीपूर्वीच भाजप काँग्रेसला धक्का देणार आहे.

sangli news : सांगलीत काँग्रेसचे युवक पदाधिकारी, अनेक माजी नगरसेवक भाजपच्या संपर्कात

महापालिकेच्या निवडणुका चार महिन्यात घेण्याचे आदेश न्यायालयाने दिले आहेत. त्यामुळे आता राजकीय हालचालींना वेग येणार आहे. अनेक जण विविध पक्षात उड्या मारण्याच्या तयारीत आहेत. महापालिकेच्या निवडणुका लांबल्याने काठावरचे अनेक जण थांबले होते. मात्र आता त्यांनी पुन्हा भाजपाच्या पदाधिकार्‍यांच्या माध्यमातून नेत्यांशी चर्चा सुरू केली आहे. काँग्रेसमधील एका युवा नेता, माजी नगरसेवक भाजपच्या संपर्कात आहे. लोकसभेच्या निवडणुकीत या पदाधिकार्‍याने अपक्ष उमेदवार विशाल पाटील यांच्या प्रचारात सक्रीय सहभाग घेतला होता.

मात्र विधानसभेनंतर विश्वासात घेतले जात नसल्याने त्यांनी पक्षावर नाराजी व्यक्त केली होती. काही दिवसांपूर्वी भाजपच्या नेत्याने पक्षप्रवेशाची ऑफर देखील दिली होती. यावर विचार करू, असे त्यांनी सांगितले होते. मात्र आता निवडणुका तोंडावर आल्याने त्यांचा भाजप प्रवेश होण्याची शक्यता आहे. यासह मिरज व सांगलीतील तीन-चार नगरसेवक भाजपच्या संपर्कात आहेत. चर्चा झाल्यानंतर व भाजपच्या जुन्यांना विश्वासात घेऊन हा प्रवेश होणार आहे.

गटबाजीमुळे माजी नगरसेवक वैतागले

लोकसभा निवडणुकीत काँग्रेसला चांगले दिवस आले होते. मात्र विधानसभा निवडणुकीत महापालिका क्षेत्रातील काँग्रेसमध्ये दोन गट पडले. अनेक माजी नगरसेवकांनी अपक्ष उमेदवार जयश्रीताई पाटील यांचा प्रचार केला. पृथ्वीराज पाटील यांना पराभवाचा धक्का बसला. सध्या काँग्रेसमध्ये गटबाजी जोरात सुरू आहे. या गटबाजीला माजी नगरसेवक वैतागले आहेत. पुन्हा पाच वर्षे विरोधात बसण्यापेक्षा भाजपमध्ये स्थान मिळविण्यासाठी प्रयत्न करत आहेत.

Author: Rajkiya Live

दिनेशकुमार ऐतवडे रा. समडोली ता. मिरज जि. सांगली हे गेल्या 25 वर्षांपासून पत्रकारिता क्षेत्रात आहेत. Bsc झाल्यानंतर शांतीनिकेतन मधून पत्रकारितेची पदवी घेतली. 1999 मध्ये त्यांनी लोकमत मधून आपल्या कामाला सुरुवात केली. त्यानंतर 1 एप्रिल 2000 ते 20 jully 2020 परेंत तरुण भारत च्या सांगली आवृत्ती मध्ये उपसंपादक पदावर काम केले. सध्या ते दैनिक जनप्रवास मध्ये उपसंपादक म्हणून काम करीत आहेत. राजकारण हा त्यांच्या मुख्य विषय आहे. सांगली, कोल्हापूर, आणि हातकणंगले लोकसभा मतदार संघावर त्यांनी भरपूर लिखाण केले आहे.