ओन्ली आज्या टोळीमध्ये टोळीप्रमुख अजय उर्फ अजित पांडुरंग खोत (वय २३, रा. वडर गल्ली, बाल हनुमान गल्ली), विकी प्रशांत पवार (वय २३), कुणाल प्रशांत पवार (वय २२), अमोल गंगाप्पा कुंचीकोरवी (वय २८), अर्जुन हणमंत पवार (वय २२, चौघे रा. अच्युतराव कुलकर्णी प्लॉट, वडर कॉलनी) आणि गणेश रामाप्पा ऐवळे (वय ३६, रा. गोकुळनगर, गल्ली क्र. २, सांगली), सुजित दादासाहेब चंदनशिवे (वय २९ रा. उत्तर शिवाजीनगर, फायर स्टेशनसमोर, सांगली) यांचा समावेश आहे.

याबाबत अधिक माहिती अशी की, बुधवार दि. १३ मार्च रोजी रात्री ११ च्या सुमारास नवीन वसाहत येथील गुरूद्वारजवळ घरासमोर अश्विनकुमार मुळके (वय ३०) थांबला होता. संशयित विकी पवार तेथून दुचाकीवरून चालला होता. विकीला हा रस्ता वाहतुकीसाठी नसल्याने जावू नको असे अश्विनकुमारने सांगितले. त्यावरून दोघांमध्ये वाद झाला. त्यानंतर विकी तेथून गेला. अश्विनीकुमारचा बदला घेण्याच्या उद्देशाने दोन तासांनी मध्यरात्री १ च्या सुमारास  दुचाकीवरून सातजण अश्विनकुमारच्या घरासमोर आले.

त्याला बाहेर बोलवून धारदार शस्त्राने तसेच स्टंप, फरशीने हल्ला चढवला. हल्ल्यानंतर संशयित शस्त्राचा धाक दाखवत तेथून पसार झाले. दि. १४ रोजी उपचार सुरु असताना अश्विनकुमार याचा मृत्यू झाला. या खूनप्रकरणी सातजणांची टोळी अटकेत होती. या टोळीविरूद्ध ‘मोक्का’ लावण्यास कोल्हापूर परिक्षेत्राचे विशेष पोलिस महानिरिक्षक सुनील फुलारी यांनी मंजुरी दिली होती. टोळीची २०१४ पासून दहशत आहे. खून, खुनाचा प्रयत्न, जबरी चोरी, गंभीर दुखापत आदी गुन्हे दाखल आहेत. टोळीला ‘मोक्का’ मध्ये अटक केली आहे. न्यायालयात हजर केल्यानंतर दहा दिवसाची पोलिस कोठडी सुनावली आहे.