sangli crime news : मोरबगी येथे फिर्याद तीन लाखाची मिळाले अडीच कोटी : सांगली : जत तालुक्यातील मोरबगी येथे सराफाच्या गाडीवर दरोडा टाकून दहा लाखांचा मुद्देमाल लंपास करणार्‍या सात जणांच्या टोळीला स्थानिक गुन्हे अन्वेषणच्या पथकाने 24 तासाच्या आत जेरबंद केले. या टोळीकडून मात्र 2 कोटी 49 लाख 88 हजारांची रोकड जप्त करण्यात आली आहे.

sangli crime news : मोरबगी येथे फिर्याद तीन लाखाची मिळाले अडीच कोटी

सराफाच्या फिर्यादीत तीन लाखांची रोकड नमूद असताना मिळालेली अडीच कोटींची रोकड नेमकी कोणाची? असा प्रश्न पडला आहे. आयकर विभागाला याबाबत कळवले असून, उमदी पोलिसही याचा तपास करत असल्याची माहिती पोलीस अधीक्षक संदीप घुगे यांनी दिली.

दरोडेखोरांच्या टोळीतील संशयित रवी तुकाराम सनदी (वय 43, रा. माळी वस्ती, उमदी), अजय तुकाराम सनदी (वय 35, रा. माळी वस्ती, उमदी, सध्या रा. गोकुळ पार्क, विजयपूर), चेतन लक्ष्मण पवार (वय 20, इंडी रस्ता, विजयपूर), लालसाब हजरत होनवाड (वय 24), आदिलशाह राजअहमद अत्तार (वय 27, रा. उमदी), सुमित सिद्धराम माने (वय 25, रा. पोखर्णी, ता. उत्तर सोलापूर), साई सिद्धू जाधव (वय 19, रा. उमदी) या सात जणांना अटक केली आहे. त्यांना सहा दिवसांची पोलिस कोठडी सुनावली आहे.

या तपासाबाबत अधीक्षक संदीप घुगे म्हणाले, उमदी (ता. जत) येथील सराफ अनिल अशोक कोडग हे दि. 14 रोजी पहाटे साडेतीनच्या सुमारास चालक सिद्धू जाधव याला घेऊन विजयपूर येथे निघाले होते. मोरबगी येथील पुलाजवळ दरोडेखोरांच्या टोळीने मोटार अडवून शस्त्राचा धाक दाखवला. दोघांना मोटारीतून बाहेर काढले. यानंतर मारहाण करत सोन्याची अंगठी, तीन लाखांची रोकड, साडेसहा लाखांची मोटार, तीन हजारांचा मोबाईल असा सुमारे दहा लाखांचा ऐवज घेऊन पलायन केले. कोडग यांनी याबाबत उमदी पोलिस ठाण्यात फिर्याद दिली.

या दरोड्याचा तपास करण्यासाठी स्थानिक गुन्हे अन्वेषण व उमदी पोलिसांचे पथक तयार केले. तांत्रिक माहिती व खबर्‍यांकडून मिळालेल्या माहितीवरून तीन संशयित कोंत्येवबोबलाद (ता. जत) येथील विजयपूर रस्त्यावरील झेंडे वस्तीवर थांबल्याची माहिती मिळाली. त्यानुसार रवी सनदी, अजय सनदी, चेतन पवार या तिघांना ताब्यात घेतले. त्यांची चौकशी केल्यानंतर मोरबगी गावाजवळ सराफाला लुटल्याची कबुली दिली. या दरोड्यातील आणखी काही संशयित उमदी येथील चडचण रस्त्यावरील माळावर थांबल्याची माहिती मिळाली.

त्यानुसार पथकाने तेथे जाऊन लालसाब होनवाड, आदिलशाह अत्तार, सुमित माने, साई जाधव या चौघांना अटक केली. त्यांनीही दरोड्याची कबुली दिली. संशयितांची चौकशी करताना अजय सनदी याने चोरीचा मुद्देमाल विजयपूर येथील घरात ठेवल्याची कबुली दिली. त्यानुसार पथकाने कर्नाटकात जाऊन सनदीच्या घराची झडती घेतली. तेव्हा बेडमध्ये तब्बल 2 कोटी 49 लाख 88 हजार रुपये मिळाले. तसेच सराफ कोडग यांची मोटारही जप्त केली. यावेळी अतिरिक्त पोलिस अधीक्षक रितू खोखर, उपअधीक्षक सुनील साळुंखे, गुन्हे अन्वेषणचे निरीक्षक सतीश शिंदे, उमदीचे सहायक निरीक्षक संदीप कांबळे उपस्थित होते.

आयकर विभागाकडून चौकशी…

अधीक्षक घुगे म्हणाले, फिर्यादी कोडग यांनी तीन लाखांची रोकड लुटल्याची तक्रार दिली होती. प्रत्यक्षात तपासात 2 कोटी 49 लाख 88 हजार रुपये मिळाले. या रकमेबाबत फिर्यादी व संशयितांनी कोणतेही विवरण दिले नाही. त्यामुळे आयकर विभागाला कळवले आहे. त्यांनी चौकशी सुरू केली आहे. प्राथमिक तपासानुसार याच गुन्ह्यातील रोकड असण्याची शक्यता आहे. सराफ कोडग यांच्या चालकाचा मुलगा साई जाधव याला त्याचे वडील मोटारीतून पैसे घेऊन जातात, याची माहिती होती.

त्याने कोडग यांचे ‘लाईव्ह लोकेशन’ मिळवले होते. त्यानुसार त्यांनी पुलावर पाळत ठेवून दरोडा टाकल्याचे तपासात स्पष्ट झाले आहे. दरोडा टाकणार्‍या टोळीकडून आणखी रोकड मिळण्याची शक्यता आहे. टोळीने पूर्वनियोजित कट रचून दरोडा टाकला आहे. पोलिस कोठडीतील तपासात त्यांची कसून चौकशी केली जाईल, असे सांगण्यात आले.

Author: Rajkiya Live

दिनेशकुमार ऐतवडे रा. समडोली ता. मिरज जि. सांगली हे गेल्या 25 वर्षांपासून पत्रकारिता क्षेत्रात आहेत. Bsc झाल्यानंतर शांतीनिकेतन मधून पत्रकारितेची पदवी घेतली. 1999 मध्ये त्यांनी लोकमत मधून आपल्या कामाला सुरुवात केली. त्यानंतर 1 एप्रिल 2000 ते 20 jully 2020 परेंत तरुण भारत च्या सांगली आवृत्ती मध्ये उपसंपादक पदावर काम केले. सध्या ते दैनिक जनप्रवास मध्ये उपसंपादक म्हणून काम करीत आहेत. राजकारण हा त्यांच्या मुख्य विषय आहे. सांगली, कोल्हापूर, आणि हातकणंगले लोकसभा मतदार संघावर त्यांनी भरपूर लिखाण केले आहे.