samdoli zp election : सत्तेच्या तिढ्यांत गुंतलेलं एक राजकीय रणक्षेत्र  मिरज तालुक्यातील समडोळी जिल्हा परिषद मतदारसंघ – हा केवळ राजकीय नकाशावरचा एक भाग नाही, तर सत्तेच्या धुक्यात हरवलेली ती रणभूमी आहे, जिथं प्रत्येक निवडणुकीत नव्याने जुळतं समीकरण, नव्याने पेटतात प्रचाराचे गारुड, आणि नव्याने घडतं एका गावाच्या भवितव्यासाठी अखेरचं युद्ध.

samdoli zp election : सत्तेच्या तिढ्यांत गुंतलेलं एक राजकीय रणक्षेत्र

हा मतदारसंघ काहीसा वेगळाच आहे – सांगली, मिरज आणि इस्लामपूर या तीन वेगवेगळ्या विधानसभा मतदारसंघांमध्ये विभागलेला. म्हणजेच इथली सत्तासंघर्षाची समीकरणं ठरतात तीन दिशांनी वाहणार्‍या प्रवाहांतून. आणि म्हणूनच, इथल्या निवडणुकीला सामान्य झुंजीचं स्वरूप राहत नाही – ती होते एक राजकीय शौर्यगाथा, जिथं मत हेच अस्त्र आणि जनतेचा विश्वास हीच कवच!

परंपरेचं वर्चस्व : समडोळीचा आवाज

गेल्या अनेक निवडणुकांमध्ये समडोळी गावाने मतदारसंघाचं नेत्तृव सांभाळलं आहे. निवृत्ती अडसूळ, सुचेता कांबळे, आणि शोभा कांबळे या नेत्यांनी इथल्या माणसांचं, त्यांच्या प्रश्नांचं, आणि त्यांच्या आश्वासक भविष्याचं प्रतिनिधित्व केलं. हा मतदारसंघ स्थापना दिनापासून आरक्षित होता. यंदाही हा मतदार संघ नागरिकांचा मागास प्रवर्गसाठी आरक्षीत झाला आहे.

हा बदल केवळ आरक्षणाचा नाही, तर राजकीय दिशा बदलवणारा क्षण आहे. कारण या परिवर्तनाने अनेक नवे चेहरे पुढे येतील, जुने समीकरणं ढासळतील, आणि गावोगावात नवा उमेदवार ठरवण्याची स्पर्धा पेटणार!

गावांचं गणित : सत्ता कुठल्या दिशेने झुकणार?

या मतदारसंघात समडोळी आणि हरिपूर ही दोन मोठी गावं आहेत – जी राजकारणाचं खरं केंद्रस्थान बनतात. तर धामणी, जुनी धामणी, अंकली, बामणी आणि ढवळी ही लहान गावं असूनही, त्यांचा सहभाग निर्णायक ठरतो. या गावांतूनच उमेदवाराच्या विजयाचं खरं उत्तर लिहिलं जातं.

धामणी, अंकली आणि हरिपूर या गावांमध्ये जमीन प्लॉटींग, वीटभट्टी उद्योग, आणि सावकारीची आर्थिक घडी मजबूत असल्याने निवडणुकीच्या काळात पैशांचा खेळ सुरू होतो. मतं म्हणजे आश्वासनांचा सौदा, आणि प्रचार म्हणजे आर्थिक हिशोबांची जुगलबंदी – अशा वातावरणात निवडणूक एक निवड नव्हे, तर गुंतवणुकीचं युध्द ठरतं.

पक्षीय चित्र : मांडवावर रंगणार्‍या ध्वजांची स्पर्धा

या मतदारसंघात काँग्रेस, राष्ट्रवादी शरद पवार गट, भाजप आणि स्वाभिमानी शेतकरी संघटना – या प्रमुख पक्षांचं स्पष्ट अस्तित्व आहे. प्रत्येक पक्षाचा गड वेगळा, प्रत्येक गावात झेंडा वेगळा.

हरिपूरमध्ये काँग्रेस, राष्ट्रवादी आणि भाजप यांचे तिढे चालू असताना, धामणी, अंकली आणि ढवळी या गावांमध्ये भाजपचं प्राबल्य दिसतं.

समडोळीमध्ये मात्र संमिश्र वातावरण आहे – इथे मतं पक्षावर नाही, तर उमेदवाराच्या कर्तृत्वावर आणि कुटुंबाच्या वलयावर दिली जातात.

गेल्या जिल्हा परिषद निवडणुकीत भाजपच्या शोभा कांबळे या केवळ 30 मतांनी विजयी झाल्या होत्या – ही आकडेवारीच सांगते की हा मतदारसंघ निव्वळ लाटांवर नव्हे, तर धडपड, जनसंपर्क आणि रणनीतीवर जिंकला जातो.

त्याच वेळी, पंचायत समितीवर राष्ट्रवादीचे अशोक मोहिते (हरिपूर) आणि भाजपच्या त्रिशला खवाटे मॅडम (अंकली) यांची निवड झाली होती – यावरून स्थानिक पातळीवर पक्ष बदलत राहतो, पण कार्यकर्त्यांची माणसं बदलत नाहीत, हे अधोरेखित होतं.

सध्या सर्वत्र कोणास मिळेल संधी? हाच प्रश्न चर्चेचा केंद्रबिंदू आहे. अनेक मोठमोठ्या नेत्यांचे आशीर्वाद कुणाच्या पाठीशी असतील, हे सांगता येणं कठीण. पण एक गोष्ट ठाम – ही निवडणूक केवळ जागेची नव्हे, प्रतिष्ठेची आहे.

निष्कर्ष : समडोळीचा निर्णय म्हणजे तीन विधानसभा मतदारसंघांतील हालचालींचा आरसा

समडोळी मतदारसंघाच्या एका निवडणुकीत सांगली, मिरज आणि इस्लामपूर या तिन्ही भागांतील राजकीय हवामान ठरतं. हा मतदारसंघ म्हणजे राजकीय शास्त्राची एक प्रयोगशाळा आहे – जिथं समाजरचनेचा, सत्तासंघर्षाचा आणि संघटनशक्तीचा अभ्यास करता येतो.

Author: Rajkiya Live

दिनेशकुमार ऐतवडे रा. समडोली ता. मिरज जि. सांगली हे गेल्या 25 वर्षांपासून पत्रकारिता क्षेत्रात आहेत. Bsc झाल्यानंतर शांतीनिकेतन मधून पत्रकारितेची पदवी घेतली. 1999 मध्ये त्यांनी लोकमत मधून आपल्या कामाला सुरुवात केली. त्यानंतर 1 एप्रिल 2000 ते 20 jully 2020 परेंत तरुण भारत च्या सांगली आवृत्ती मध्ये उपसंपादक पदावर काम केले. सध्या ते दैनिक जनप्रवास मध्ये उपसंपादक म्हणून काम करीत आहेत. राजकारण हा त्यांच्या मुख्य विषय आहे. सांगली, कोल्हापूर, आणि हातकणंगले लोकसभा मतदार संघावर त्यांनी भरपूर लिखाण केले आहे.