nandre news : जिल्हा परिषद सदस्य म्हणजे नांद्र्यासाठी शाप? यंदा तरी गावातील सदस्य होणार काय?: मिरज तालुक्यातील नांद्रे हे गाव आजवर अनेक आघाड्यांवर सशक्त आणि स्वयंपूर्ण राहिले आहे. लोकसंख्या, सहकारी संस्था, बँका, पतसंस्था, पाणीपुरवठा योजना – या साऱ्याचा पसारा इथल्या विकासाची साक्ष देतो. स्व. वसंतदादा पाटील, प्रकाशबापू, विष्णुअण्णा, संभाजी पवार, शरद पाटील यांच्या जाज्वल्य मार्गदर्शनाखाली घडलेले हे गाव म्हणजे राजकीय नेतृत्वाचे विद्यापीठच!

nandre news : जिल्हा परिषद सदस्य म्हणजे नांद्र्यासाठी शाप? यंदा तरी गावातील सदस्य होणार काय?

नांद्रे: नेतृत्वाची खाण, पण जिल्हा परिषद सदस्यत्वापासून वंचित – का?

परंतु या साऱ्या वैभवाच्या पार्श्वभूमीवर एक दुःखद वास्तव आजही नांद्र्याच्या माथ्यावर शापासारखे आहे – आजवर या गावाला जिल्हा परिषदेवर एकही सदस्य पाठवता आलेला नाही.

पाणीपुरवठा योजनेचे जनक गुमट पाटील, सांगली कारखान्याचे संचालक स्व. महावीर पाटील, शेतकरी बँकेचे उपाध्यक्ष नरसगोंडा पाटील, आणि अन्य अनेक दिग्गज नेतृत्व गावात असूनही, नांद्रे जिल्हा परिषदेच्या दारातच अडखळले.

कधी कर्नाळचे शामराव कदम निवडून आले, तर कधी कसबे डिग्रजच्या जोडणीने डिग्रजचेच वर्चस्व प्रस्थापित झाले. एकदा नरसगोंडा पाटील यांना संधी मिळाली खरी, पण त्यांना पराभवाचा तोंड द्यावा लागले – तोही घरच्या घातापोटी.

कारण स्पष्ट आहे – गावातले गटातटाचे राजकारण, विखुरलेले नेतृत्व, एकमेकांची पायपिशवी ओढण्याची परंपरा आणि पाण्यावरचे सत्तासंघर्ष. याच वैमनस्यामुळे गावाने जिल्हा परिषदेची खुर्ची गमावली.

नांद्र्याचे दुर्भाग्य हे की, नेतृत्व आहे – पण एकवाक्यतेचा अभाव आहे. उमेदवार आहेत – पण पाठिंबा नाही. गावासाठी धडपडणारे आहेत – पण गाव त्यांच्यामागे नाही.

आज गरज आहे ती केवळ एका गोष्टीची – एकीची. जर नांद्रे एकजुटीने उभे राहिले, भूतकाळ विसरून भविष्यासाठी एक झाले, तर जिल्हा परिषद सदस्यत्व हे स्वप्न राहणार नाही – ते वास्तव होईल.

नाहीतर ‘नेतृत्वाची खाण’ असलेले हे गाव, राजकारणाच्या या खाणीतच गाडले जाईल!

Author: Rajkiya Live

दिनेशकुमार ऐतवडे रा. समडोली ता. मिरज जि. सांगली हे गेल्या 25 वर्षांपासून पत्रकारिता क्षेत्रात आहेत. Bsc झाल्यानंतर शांतीनिकेतन मधून पत्रकारितेची पदवी घेतली. 1999 मध्ये त्यांनी लोकमत मधून आपल्या कामाला सुरुवात केली. त्यानंतर 1 एप्रिल 2000 ते 20 jully 2020 परेंत तरुण भारत च्या सांगली आवृत्ती मध्ये उपसंपादक पदावर काम केले. सध्या ते दैनिक जनप्रवास मध्ये उपसंपादक म्हणून काम करीत आहेत. राजकारण हा त्यांच्या मुख्य विषय आहे. सांगली, कोल्हापूर, आणि हातकणंगले लोकसभा मतदार संघावर त्यांनी भरपूर लिखाण केले आहे.