kosari news : कंटेनरला मागून चारचाकीची धडक, कोसारीचे ग्रामसेवक महेश ममाने यांचा जागेवरच मृत्यू : जत तालुक्यातील कोसारी गावचे ग्रामसेवक महेश मनोहर ममाने यांच्या दुर्दैवी अपघाती निधनाने संपूर्ण परिसर हळहळला आहे. कर्तव्य बजावून घरी परतणार्‍या एका जबाबदार अधिकार्‍याचा प्रवास काही क्षणांत कायमचा थांबला आणि ममाने कुटुंबावर दु:खाचा डोंगर कोसळला.

kosari news : कंटेनरला मागून चारचाकीची धडक, कोसारीचे ग्रामसेवक महेश ममाने यांचा जागेवरच मृत्यू

कोसारी येथे ग्रामसेवक म्हणून कार्यरत असलेले महेश ममाने (वय 53, रा. सांगली) हे नेहमीप्रमाणे आपले काम आटोपून इंडिका कार (एमएच 18 पी 0245) मधून जतहून सांगलीकडे निघाले होते. रत्नागिरी-नागपूर महामार्गावरून भरधाव वेगाने प्रवास सुरू असताना कळंबी गावाच्या हद्दीत काळाने अचानक घाला घातला. रस्त्याच्या कडेला उभ्या असलेल्या पीजी 04-8195 या कंटेनरला त्यांच्या कारची मागून भीषण धडक बसली.

धडक इतकी जबरदस्त होती की इंडिका कार थेट कंटेनरच्या मागील भागात घुसली. या भीषण अपघातात महेश ममाने यांच्या डोक्याला गंभीर दुखापत झाली आणि त्यांचा जागीच मृत्यू झाला. कारचा पुढील भाग पूर्णपणे चेंदामेंदा झाल्याने मृतदेह बाहेर काढण्यासाठी क्रेनची मदत घ्यावी लागली. अपघाताचे भीषण दृश्य पाहून घटनास्थळी उपस्थितांच्याही अंगावर काटा आला.

प्राथमिक माहितीनुसार, वाहन चालविताना त्यांना डुलकी लागल्याची शक्यता व्यक्त केली जात आहे. काही क्षणांच्या दुर्लक्षामुळे एका कुटुंबाचा आधारवड कायमचा हरपला. हा संपूर्ण अपघात सीसीटीव्हीत कैद झाला असून, तो पाहून प्रत्येकाच्या मनात हळहळ व्यक्त होत आहे.

अपघाताची बातमी समजताच ममाने यांच्या कुटुंबियांवर शोककळा पसरली. मूळचे जत तालुक्यातील धावडवाडी गावचे असलेले महेश ममाने सध्या मुलाच्या शिक्षणासाठी सांगलीत वास्तव्यास होते. त्यांचा मुलगा बारावीचे शिक्षण घेत असून, वडिलांच्या अकाली निधनाने कुटुंब पूर्णपणे हादरून गेले आहे.

महेश ममाने हे कर्तव्यदक्ष, शांत आणि सर्वांना मदत करणारे अधिकारी म्हणून ओळखले जात होते. त्यांच्या निधनाची वार्ता पसरताच जत तालुक्यातील ग्रामसेवक, कर्मचारी आणि नागरिकांनी घटनास्थळी व रुग्णालयात गर्दी केली. प्रत्येकाच्या डोळ्यांत अश्रू आणि मनात हळहळ होती. एका मनमिळावू ग्रामसेवकाचा असा दुर्दैवी अंत झाल्याने संपूर्ण परिसर शोकमग्न झाला आहे.

Author: Rajkiya Live

दिनेशकुमार ऐतवडे रा. समडोली ता. मिरज जि. सांगली हे गेल्या 25 वर्षांपासून पत्रकारिता क्षेत्रात आहेत. Bsc झाल्यानंतर शांतीनिकेतन मधून पत्रकारितेची पदवी घेतली. 1999 मध्ये त्यांनी लोकमत मधून आपल्या कामाला सुरुवात केली. त्यानंतर 1 एप्रिल 2000 ते 20 jully 2020 परेंत तरुण भारत च्या सांगली आवृत्ती मध्ये उपसंपादक पदावर काम केले. सध्या ते दैनिक जनप्रवास मध्ये उपसंपादक म्हणून काम करीत आहेत. राजकारण हा त्यांच्या मुख्य विषय आहे. सांगली, कोल्हापूर, आणि हातकणंगले लोकसभा मतदार संघावर त्यांनी भरपूर लिखाण केले आहे.