samdoli zp news : संकेत आलासे : समडोळी जिल्हा परिषद मतदारसंघात नव्या आशेचा किरण! : राजकारण हे केवळ सत्तेचे नव्हे, तर समाजसेवेचे साधन आहे — आणि या तत्त्वाचा जिवंत पुरावा म्हणजे इनाम धामणीचे सुपुत्र संकेत आलासे. ओबीसीच नव्हे, तर सर्व समाजघटकांतील तळागाळातील माणसांना मुख्य प्रवाहात आणण्याचा, त्यांच्या जीवनात प्रकाश फुलवण्याचा त्यांनी घेतलेला संकल्प आज मिरज तालुक्याच्या सीमारेषा ओलांडून चर्चेचा विषय ठरत आहे.

samdoli zp news : संकेत आलासे : समडोळी जिल्हा परिषद मतदारसंघात नव्या आशेचा किरण!

जिल्हा परिषद आणि पंचायत समिती निवडणुकांची रणधुमाळी सुरु झाली आहे. या पार्श्वभूमीवर समडोळी जिल्हा परिषद मतदारसंघ ओबीसी पुरुष राखीव घोषित झाल्यानंतर, या मतदारसंघातून संकेत आलासे यांच्या नावाची जोरदार चर्चा सर्वत्र घुमू लागली आहे. गावोगाव, वाड्या-वस्त्यांवर, चहाच्या टपऱ्यांवर — एकच चर्चा, “या वेळी संकेत आलासे हवेत!”

 समाजकारणातून घडलेले नेतृत्व

सन २०१० ते २०१५ या काळात इनाम धामणी ग्रामपंचायतीचे सदस्य म्हणून काम करताना आलासे यांनी केवळ विकासाचे स्वप्न पाहिले नाही, तर ते प्रत्यक्षात उतरवले. भारतीय जीवन विमा निगम (LIC) मध्ये विमा प्रतिनिधी म्हणून कार्य करत असताना त्यांनी गावाला सन २००९ मध्ये ‘बीमा ग्राम’ हा राष्ट्रीय पुरस्कार मिळवून दिला — ही इनाम धामणीसाठी अभिमानाची बाब ठरली.

या माध्यमातून त्यांनी जैन बस्ती परिसरात कूपनलिका (बोअर) मारून दिली, ज्यामुळे गावकऱ्यांच्या पाण्याच्या समस्येवर कायमस्वरूपी उपाय झाला.

 लोकआंदोलन व समाजहिताचे योगदान

संकेत आलासे हे फक्त विकासकार्यासाठी नव्हे, तर समाजहिताच्या प्रश्नांसाठीही सदैव लढणारे कार्यकर्ते आहेत.
मराठा क्रांती मोर्चा, लिंगायत समाजाचा मोर्चा, महादेव कोळी समाजाचा मोर्चा, विविध धरणे आंदोलनांमध्ये त्यांनी सक्रिय सहभाग घेतला.
तसेच कोल्हापूर येथे उच्च न्यायालयाचे खंडपीठ व्हावे या मागणीसाठी झालेल्या एकदिवसीय साखळी उपोषणातही त्यांनी हिरारीने भाग घेतला.

पूरकाळातही त्यांनी आपली सामाजिक बांधिलकी दाखवली —

आपल्या सोबतच्या मित्रांना घेऊन त्यांनी अंकली, जुनी धामणी, निलजी, बामणी आणि शेजारील गावांतील पूरग्रस्तांसाठी जेवणाची व्यवस्था केली, जनावरांसाठी चाऱ्याची उपलब्धता करून दिली तसेच पूर ओसरल्यानंतर रोगराई पसरू नये म्हणून औषध फवारणीचे आयोजन केले.
ही केवळ सेवा नव्हती — ती एक जबाबदार नागरिकाची, एक संवेदनशील नेत्याची ओळख होती.

 सांस्कृतिक आणि सामाजिक जनचळवळीचे प्रेरणास्थान

संकेत आलासे हे युवा क्रांती गणेशोत्सव मंडळ, दुर्गाशक्ती महिला नवरात्र उत्सव मंडळ, आणि श्री महर्षि वाल्मिकी कोळी समाज विकास चॅरिटेबल ट्रस्ट, इनाम धामणी यांच्या माध्यमातून सामाजिक कार्यात अग्रस्थानी राहिले आहेत.
लेझीम स्पर्धा, रक्तदान शिबिरे, व्याख्यानमाला, महाप्रसाद कार्यक्रम यामध्ये त्यांनी सदैव पुढाकार घेतला आहे.

ते दुर्गामाता दौडीत नियमित सहभाग घेतात, शालेय मुलांना वही वाटप, खेळाडू आणि विद्यार्थ्यांना प्रोत्साहन देणे, हे त्यांच्या कार्याचे वैशिष्ट्य आहे.
सर्वांना बरोबर घेऊन जाणे, सर्वांचा आदर करणे हा त्यांच्या स्वभावाचा गाभा आहे — त्यामुळेच ते सर्व समाजघटकांमध्ये प्रिय आहेत.

 कौटुंबिक आणि राजकीय पार्श्वभूमी

सन २०१२ आणि २०१७ या दोन्ही निवडणुकांत समडोळी मतदारसंघ ओबीसी महिला आरक्षणासाठी राखीव होता. त्या वेळी संकेत आलासे यांनी आपल्या मातोश्री सुरेखा आलासे यांच्या उमेदवारीसाठी अथक प्रयत्न केले, मात्र तिकीट मिळाले नाही.
आज पुन्हा एकदा हीच संधी ओबीसी पुरुषासाठी खुली झाली असून, संकेत आलासे यांना संधी देऊन गेल्या दोन वेळेचा डाग पुसला जावा, अशी मागणी सर्व स्तरांतून जोर धरत आहे.

 कोळी समाजासाठी विशेष कार्य

संकेत आलासे हे सांगली जिल्हा आदिवासी महादेव कोळी जमात संघटनेच्या कार्यकारिणीमध्ये सचिव म्हणून कार्यरत राहिले आहेत.
या पदावर असताना त्यांनी कोळी समाजातील दहावी-बारावीतील गुणवंत विद्यार्थ्यांचा, सरपंच, उपसरपंच, ग्रामपंचायत सदस्य, सोसायटी संचालक आणि शासकीय अधिकाऱ्यांचा सत्कार आयोजित केला.
तसेच वधू-वर मेळावे, समाजसंवाद कार्यक्रम आणि एकोपा निर्माण करणाऱ्या उपक्रमांमध्ये ते नेहमीच पुढे राहिले आहेत.

 शैक्षणिक पार्श्वभूमी

संकेत आलासे यांनी डी. फार्मसी (डिप्लोमा इन फार्मसी) हे शिक्षण पूर्ण केले आहे. औषधनिर्माण क्षेत्रातील अभ्यासामुळे त्यांच्यातील शिस्त, नेमकेपणा आणि सेवा भाव यांचा प्रभाव त्यांच्या सामाजिक कार्यातही दिसून येतो.

 निवडणूक समीकरणांमध्ये नवा चेहरा

समडोळी जिल्हा परिषद मतदारसंघात समडोळी, हरिपूर, अंकली, इनाम धामणी, जुनी धामणी, निलजी, बामणी, ढवळी ही गावे आहेत. या सर्वच गावांत त्यांनी वैयक्तिक संवाद, सामाजिक कार्य आणि सद्भावनेचे पूल उभारले आहेत. परिणामी, “संकेत आलासे यांना भाजपने तिकीट द्यावे” अशी मागणी सर्वसामान्य मतदारांपासून ते कार्यकर्त्यांपर्यंत जोर धरू लागली आहे.

लोकमत स्पष्ट आहे —
 “कार्य आहे, कर्तृत्व आहे, आणि समाजात आदर आहे — मग संधी का नाही?”

भाजपने जर संकेत आलासे यांच्या कार्याचा आणि लोकसंपर्काचा विचार केला, तर समडोळी मतदारसंघातून विजयी पताका नक्कीच त्यांच्या हातात फडकताना दिसेल, असा ठाम विश्वास नागरिकांत निर्माण झाला आहे.

 धामणीचा उदयता तारा — संकेत आलासे, एक आश्वासक, प्रामाणिक आणि जनतेशी नाळ जपणारा युवा चेहरा! 

Author: Rajkiya Live

दिनेशकुमार ऐतवडे रा. समडोली ता. मिरज जि. सांगली हे गेल्या 25 वर्षांपासून पत्रकारिता क्षेत्रात आहेत. Bsc झाल्यानंतर शांतीनिकेतन मधून पत्रकारितेची पदवी घेतली. 1999 मध्ये त्यांनी लोकमत मधून आपल्या कामाला सुरुवात केली. त्यानंतर 1 एप्रिल 2000 ते 20 jully 2020 परेंत तरुण भारत च्या सांगली आवृत्ती मध्ये उपसंपादक पदावर काम केले. सध्या ते दैनिक जनप्रवास मध्ये उपसंपादक म्हणून काम करीत आहेत. राजकारण हा त्यांच्या मुख्य विषय आहे. सांगली, कोल्हापूर, आणि हातकणंगले लोकसभा मतदार संघावर त्यांनी भरपूर लिखाण केले आहे.