ashta nagarpalika news : आष्ट्यात कमळाच्या घोषणेनं ’घड्याळ’वाल्यांची गडबड : राजकारणात घोषणांची ताकद काय असते, हे नुकतंच आष्टा नगरपालिकेच्या राजकीय पटावर पुन्हा एकदा दिसून आलं. भाजपचे ज्येष्ठ नेते म्हणून ओळखले जाणारे चंद्रकांतदादा पाटील यांनी आष्ट्यात भाजपचे नवीन कार्यालय उद्घाटनाच्या कार्यक्रमात केलेली घोषणा – नगराध्यक्ष पदाची निवडणूक केवळ कमळ चिन्हावरच लढविली जाईल – ह्या एका वाक्याने संपूर्ण समीकरणं ढवळून निघाली आहेत.
ashta nagarpalika news : आष्ट्यात कमळाच्या घोषणेनं ’घड्याळ’वाल्यांची गडबड
ही घोषणा म्हणजे प्रविण माने आणि निशिकांत पाटील यांच्या राजकीय स्वप्नांवर पाणी फेरणारी वज्रघातक बातमीच ठरली आहे. गेल्या अनेक महिन्यांपासून आष्टा नगराध्यक्ष पदासाठी आपली गोटं मजबूत करत, घराघरात प्रचाराची रणधुमाळी उडवत असलेल्या प्रविण माने यांच्या भूमिकेला या घोषणेमुळे जोरदार हादरा बसला आहे.
घड्याळवाल्यांची उचलेगिरी आणि भाजपची ‘कमळ’ निष्ठा
एकीकडे निशिकांत पाटील आणि प्रविण माने हे दोघेही राष्ट्रवादीच्या अजित पवार गटात आपलं नशीब अजमावत होते. भाजपमधून राष्ट्रवादीत वळण घेणारे हे नेते, कमळाच्या आधाराने घड्याळ हातात घेऊन राजकारणाची दिशा बदलण्याच्या प्रयत्नात होते. पण चंद्रकांतदादांनी एकच बाण सोडून त्यांच्या राजकीय बंगल्याच्या पाया हादरवले आहेत.
आष्टा सारख्या संवेदनशील राजकीय भूमीवर कमळ निशाणाखाली निवडणूक लढविण्याची घोषणा म्हणजे भाजपची आपली ताकद आपणच सिद्ध करायची अशी ठाम भूमिका दर्शवते. यामधून पक्षांतर्गत शिस्तीचा संदेशही दिला गेला आहे – घड्याळ सोडून गेलेल्यांना कमळ परत देणार नाही!
इस्लामपूरचं पारडं आणि आष्ट्यातलं स्वप्न
इस्लामपूर विधानसभा मतदारसंघात निशिकांत पाटील यांनी जयंत पाटलांना दिलेलं आव्हान म्हणजे त्यांच्या आत्मविश्वासात भर घालणारी लढत होती. जयंत पाटील यांचं मताधिक्य अवघ्या 13 हजारांवर येणं, हे विरोधकांसाठी मोठं यश मानलं जात होतं. विशेषतः आष्टा शहरात केवळ 81 मतांची आघाडी राहिल्यामुळे, निशिकांत पाटील गटाने आष्ट्यावर लक्ष केंद्रीत करून तेथील राजकारणात ‘गोट’ बसवायला सुरुवात केली होती.
प्रविण माने यांनी तर नगराध्यक्ष पदासाठी प्रचाराची रणधुमाळी सुरू केली होती – घराघरांतून मते खेचू, शहर आपलंच आहे, असं गृहीत धरून.
मात्र आता चंद्रकांतदादांच्या घोषणेनं हे सगळं ‘मृगजळ’ ठरलं आहे. भाजपकडून अधिकृत उमेदवार आणि तोही केवळ कमळ चिन्हावर असणार, असं स्पष्ट केल्यामुळे प्रविण माने यांची उभ्या पीकावर गारपीट झाल्यासारखी अवस्था झाली आहे.
पुढचं पाऊल – ‘वेट अँड वॉच’ की नवीन खेळी?
चंद्रकांतदादांनी केलेल्या जाहीर घोषणेनंतर आता निशिकांत पाटील व प्रविण माने काय पाऊल उचलणार, याकडे संपूर्ण जिल्ह्याचे लक्ष लागले आहे. ते परत भाजपमध्ये यायचा प्रयत्न करतील का? की ‘घड्याळ’चं नवीन रणनीती आखतील?
भाजपकडून त्यांच्यासाठी दरवाजे उघडे राहतील का, की ’फाटक बंद’ झालं आहे, हे सुद्धा पाहणं औत्सुक्याचं ठरणार आहे. एक गोष्ट मात्र स्पष्ट आहे – भाजप आता आपलेच चेहरे, आपलीच शिस्त या फॉर्म्युलावर चालणार आहे.
हे केवळ निवडणुकीचं नव्हे, प्रतिष्ठेचं युद्ध
आष्टा नगराध्यक्ष पदाची ही निवडणूक आता केवळ विकासाची नाही, तर राजकीय अस्तित्वाची आणि निष्ठेची कसोटी ठरणार आहे. हे सर्व मिळून आष्ट्याचं राजकारण सध्या चांगलंच रंगत आहे.
चंद्रकांतदादांची घोषणा म्हणजे एका डावात सगळ्या मोहरा उलटवण्याची रणनीती ठरली आहे. आता प्रविण माने आणि निशिकांत पाटील काय डाव टाकतात, हे लवकरच स्पष्ट होईल. मात्र त्यांच्या पुढचं पाऊल हे ठरवेल – राजकीय वाळवंटात भटकंती की मिळेल नव्याने संधी!
Author: Rajkiya Live
दिनेशकुमार ऐतवडे रा. समडोली ता. मिरज जि. सांगली हे गेल्या 25 वर्षांपासून पत्रकारिता क्षेत्रात आहेत. Bsc झाल्यानंतर शांतीनिकेतन मधून पत्रकारितेची पदवी घेतली. 1999 मध्ये त्यांनी लोकमत मधून आपल्या कामाला सुरुवात केली. त्यानंतर 1 एप्रिल 2000 ते 20 jully 2020 परेंत तरुण भारत च्या सांगली आवृत्ती मध्ये उपसंपादक पदावर काम केले. सध्या ते दैनिक जनप्रवास मध्ये उपसंपादक म्हणून काम करीत आहेत. राजकारण हा त्यांच्या मुख्य विषय आहे. सांगली, कोल्हापूर, आणि हातकणंगले लोकसभा मतदार संघावर त्यांनी भरपूर लिखाण केले आहे.
