miraj crime news : मिरजेत रोपवायर कुलूपाचा फास — एका चिमुकल्याचा उमलताना तुटलेला जीवनप्रवाह : मिरजेतील दर्गामाता मंदिराजवळील पाण्याच्या टाकीजवळ राहणारा अमोल संजय मळवाडे (वय 14) या निरागस मुलाचा रोपवायर कुलपाच्या फासा लागून झालेला मृत्यू संपूर्ण परिसराला शोकसागरात बुडवून गेला. जणू एखादं कोंब फुलण्याआधीच कोमेजून जावं, तसा हा अकस्मात झालेला अंत सर्वांच्या मनावर खोल जखम करून गेला.
miraj crime news : मिरजेत रोपवायर कुलूपाचा फास — एका चिमुकल्याचा उमलताना तुटलेला जीवनप्रवाह
अमोल—इयत्ता नववीत शिकणारा, आई-वडिलांचा आधार, स्वप्नांनी भरलेलं छोटं आयुष्य… आई-वडील रोजंदारीवर कष्ट करणारे. घरातली परिस्थिती साधी, पण अमोलच्या डोळ्यात मात्र उद्याचा उजेड चमकत होता.
दररोजप्रमाणे शाळेतून आल्यावर तो दुपारी क्लासला जायला सज्ज होत होता. मित्रही त्याला बोलवायला घरात आले होते. मधेच किराणा दुकानातून साहित्य आणण्याचे आईने दिलेले काम तो शांतपणे करून आला. घरातून दप्तर घेवून क्लासला निघायचं होतं… पण नियतीनेच कदाचित दुसरी वाट ठरवून ठेवली होती.
मित्रांनी “अमोल… अमोल…” अशी हाक मारली. पण आतून कसलाच आवाज आला नाही. शेजाऱ्यांनी काळजीपोटी घरात पाऊल टाकलं आणि एक हृदय पिळवटून टाकणारे दृश्य त्यांच्या नजरेस पडले.
लोखंडी जिन्याशी खेळताना, हातातल्या सायकलच्या रोपवायर कुलूपाशी नकळत खेळ करताना, त्याच कुलपाचा फास अमोलच्या गळ्यात अडकला… लॉक बंद झाला… आणि क्षणार्धात त्याचं कोवळं आयुष्य संपलं.
शेजाऱ्यांनी जीवाच्या आकांताने लोखंडी वायर कापली. तातडीने त्याला शासकीय रुग्णालयात नेण्यात आलं. पण डॉक्टरांच्या हातात येईपर्यंत तो देवाघरी निघून गेला होता.
अमोलच्या मृत्यूची बातमी जसेच कानी पडली, तसे घराच्या उंबरठ्यावर अश्रूंनी डबडबलेला अंधार पसरला.
आईचा हंबरडा संपूर्ण परिसराला चिरत गेला. रोजच्या कष्टातही मुलासाठी जगणाऱ्या त्या आईच्या हृदयाचा आज आवाज फुटला होता.
वडील कामावरून घरी धावत आले… आणि आपल्या लेकराच्या मृतदेहाकडे पाहताच त्यांनी काढलेला आक्रोश काळीज छिन्नविछिन्न करून गेला.
आज संपूर्ण परिसरात शांतता आहे, पण या शांततेत अमोलच्या अकाली जाण्याची वेदना, अपार हळहळ आणि असहाय्यतेची कळ दडलेली आहे.
फक्त 14 वर्षांचं कोवळं आयुष्य… स्वप्नांची पेटी भरलेला एक मुलगा… आणि क्षणभराच्या चुकांमुळे कायमस्वरूपी पोकळी
Author: Rajkiya Live
दिनेशकुमार ऐतवडे रा. समडोली ता. मिरज जि. सांगली हे गेल्या 25 वर्षांपासून पत्रकारिता क्षेत्रात आहेत. Bsc झाल्यानंतर शांतीनिकेतन मधून पत्रकारितेची पदवी घेतली. 1999 मध्ये त्यांनी लोकमत मधून आपल्या कामाला सुरुवात केली. त्यानंतर 1 एप्रिल 2000 ते 20 jully 2020 परेंत तरुण भारत च्या सांगली आवृत्ती मध्ये उपसंपादक पदावर काम केले. सध्या ते दैनिक जनप्रवास मध्ये उपसंपादक म्हणून काम करीत आहेत. राजकारण हा त्यांच्या मुख्य विषय आहे. सांगली, कोल्हापूर, आणि हातकणंगले लोकसभा मतदार संघावर त्यांनी भरपूर लिखाण केले आहे.
