zp election news : राजकीय घराण्यांमध्ये हलचल: सौभाग्यवतींची शर्यत सुरू! : सांगली जिल्हा परिषदेच्या राजकारणात पुन्हा एकदा खळबळ माजली आहे. अनेक वर्षांनी जिल्हा परिषद अध्यक्षपद हे सर्वसाधारण महिलांसाठी आरक्षित झाल्याने राजकीय घराण्यांमध्ये हालचाल सुरू झाली आहे. या नव्या आरक्षणामुळे जिल्ह्याच्या राजकारणात एक वेगळीच चुणूक पाहायला मिळत आहे. सत्ता, सत्तेच्या भोवतालचे आकडे, गट-तट आणि त्या गटांतील सत्तेच्या नव्या चेहऱ्यांची कुजबुज सुरू झाली आहे.

zp election news : राजकीय घराण्यांमध्ये हलचल: सौभाग्यवतींची शर्यत सुरू!

नुकतेच जाहीर झालेल्या आरक्षणात महिलांसाठी आलेल्या या सुवर्णसंधीला राजकीय घराण्यांनी सोन्याची संधी मानून, आपल्या सौभाग्यवतींना राजकारणाच्या रणांगणात उतरवण्यासाठी जोमाने तयारी सुरू केली आहे. एकीकडे सत्तेचा डाव मांडला जात असताना, दुसरीकडे या रणरागिणींच्या नावांची चर्चा गावकुसापासून ते जिल्ह्याच्या राजकीय पटलावर रंगू लागली आहे.

भाजपाच्या वर्तुळात मीनाक्षी नानासाहेब महाडिक, हर्षदा राहुल महाडिक, रेणुकादेवी सत्यजित देशमुख यांची नावे चर्चेत आहेत. तर शिंदेसेने कडून शीतल अमोल बाबर, सोनिया सुहास बाबर या नावांची कुजबुज सुरू आहे.

रयत क्रांती संघटनेकडून मोहिनी सागर खोत या तयार असल्याचे बोलले जाते.

राष्ट्रवादी काँग्रेस (अजित पवार गट) कडून देवयानी नाईक यांचे नाव चर्चेत असून, राष्ट्रवादी काँग्रेस (शरद पवार गट) कडून सुप्रिया देवराज पाटील, संगीता संभाजीराव पाटील, अश्विनी नाईक, भाग्यश्री वैभव शिंदे, मेघा संभाजी कचरे या देखील आघाडीवर आहेत.

काँग्रेस पक्ष सुद्धा मागे नाही. पूजा विशाल पाटील आणि वैशाली शांताराम कदम या नेत्यांच्या पत्नींच्या नावांचीही जोरदार चर्चा आहे.

ही केवळ निवडणूक नाही, हे प्रत्येकीच्या अस्तित्वाचं आणि प्रतिनिधित्वाचं एक स्वप्न आहे. राजकारणात अनेकदा केवळ सत्तेच्या संधी मिळतात, पण या महिलांना आता त्या सत्तेवर शिक्कामोर्तब करण्याची संधी आहे. गावखेड्यांमधून राजकारणाच्या उच्च पातळीवर पोहोचण्यासाठी ही संधी महत्त्वाची आहे.

नेते आपल्या सौभाग्यवतींना पुढे करत असले, तरी यामागे महिलांच्या नेतृत्वशक्तीवरचा विश्वासही आहे, असा एक भावनिक आणि सामाजिक संदेश देखील यातून उमटतो आहे.

आगामी निवडणूक म्हणजे सत्ता काबीज करण्याची शर्यतच नव्हे, तर सांगलीच्या राजकीय भवितव्याला दिशा देणाऱ्या एका यशस्विनी महिला नेतृत्वाचा उदय होण्याची साक्ष देणारा क्षण आहे.

पुढील काही दिवस सांगली जिल्ह्याच्या राजकारणात चैतन्याने भरलेले असणार आहेत. कोण होईल जिल्हा परिषद अध्यक्ष? कोण होईल सांगलीच्या ग्रामीण विकासाचा चेहरा? या प्रश्नांची उत्तरे येणाऱ्या काळात उलगडतीलच… पण इतकं नक्की, की ही निवडणूक केवळ मतांची नव्हे, तर भाग्याच्या फेऱ्यांची असणार आहे.

Author: Rajkiya Live

दिनेशकुमार ऐतवडे रा. समडोली ता. मिरज जि. सांगली हे गेल्या 25 वर्षांपासून पत्रकारिता क्षेत्रात आहेत. Bsc झाल्यानंतर शांतीनिकेतन मधून पत्रकारितेची पदवी घेतली. 1999 मध्ये त्यांनी लोकमत मधून आपल्या कामाला सुरुवात केली. त्यानंतर 1 एप्रिल 2000 ते 20 jully 2020 परेंत तरुण भारत च्या सांगली आवृत्ती मध्ये उपसंपादक पदावर काम केले. सध्या ते दैनिक जनप्रवास मध्ये उपसंपादक म्हणून काम करीत आहेत. राजकारण हा त्यांच्या मुख्य विषय आहे. सांगली, कोल्हापूर, आणि हातकणंगले लोकसभा मतदार संघावर त्यांनी भरपूर लिखाण केले आहे.