sangli-satara electionसातारा-सांगली विधान परिषद ; भाजपची चार नावे दिल्ली दरबारी: सातारा-सांगलीच्या राजकीय पटावर पुन्हा एकदा विधान परिषद निवडणुकीची रणधुमाळी रंगू लागली आहे. सहकार, स्थानिक स्वराज्य संस्था आणि जिल्ह्याच्या राजकारणात नेहमीच निर्णायक ठरलेल्या या मतदारसंघाकडे आता संपूर्ण महाराष्ट्राचे लक्ष लागले आहे. महायुती आणि महाविकास आघाडी दोन्ही बाजूंनी जोरदार मोर्चेबांधणी सुरू असून, प्रत्येक मत आणि प्रत्येक नेत्याची भूमिका येथे महत्त्वाची ठरणार आहे.

sangli-satara electionसातारा-सांगली विधान परिषद ; भाजपची चार नावे दिल्ली दरबारी

या पार्श्वभूमीवर भाजपकडून सम्राट महाडिक, पृथ्वीराज देशमुख, धैर्यशील कदम आणि शेखर गोरे ही चार नाव उमेदवारीसाठी चार प्रमुख नावे प्रदेश नेतृत्वाने केंद्रीय निवड समितीकडे पाठवल्याची जोरदार चर्चा राजकीय वर्तुळात सुरू आहे. आता या चार नावांपैकी कोणाच्या नावावर दिल्लीतील भाजपश्रेष्ठी शिक्कामोर्तब करणार, की ऐनवेळी एखादे नवे नाव पुढे येणार, याकडे सर्वांच्या नजरा लागल्या आहेत. त्यामुळे इच्छुकांच्या गोटात उत्सुकता, तर कार्यकर्त्यांमध्ये चर्चांना उधाण आले आहे.

मागील निवडणुकीची आठवण आजही राजकीय वर्तुळात ताजी आहे. त्या वेळी काँग्रेस आणि राष्ट्रवादी काँग्रेस यांच्यात झालेली चुरशीची लढत राज्यभर चर्चेचा विषय ठरली होती. उपमुख्यमंत्री Ajit Pawar यांनी राष्ट्रवादीकडून शेखर गोरे यांना मैदानात उतरवले होते,

तर काँग्रेसकडून दिवंगत पतंगराव कदम यांचे बंधू मोहनराव कदम रिंगणात होते. अत्यंत अटीतटीच्या या लढतीत मोहनराव कदम यांनी विजय मिळवत बाजी मारली होती. त्यामुळे यंदा कोणता चेहरा मैदानात उतरणार आणि कोणाच्या गळ्यात विजयाची माळ पडणार, याबाबत उत्सुकता शिगेला पोहोचली आहे.

राजकीय गणितही या मतदारसंघात तितकेच रंजक आहे. उपलब्ध संख्याबळ पाहता भाजपकडे तब्बल ३१४ मतदार आहेत. त्याखालोखाल राष्ट्रवादी काँग्रेसकडे २०५, राष्ट्रवादी काँग्रेस शरदचंद्र पवार पक्षाकडे ११९, शिवसेनेकडे १११, काँग्रेसकडे ७३, तर शिवसेना उद्धव बाळासाहेब ठाकरे पक्षाकडे १ मत आहे.

याशिवाय सातारा आणि सांगली जिल्ह्यातील अपक्ष व स्थानिक आघाड्यांची ताकदही लक्षणीय आहे. त्यामुळे या निवडणुकीत आकडेमोड जितकी महत्त्वाची, तितकीच राजकीय रणनीती आणि पडद्यामागील हालचाल निर्णायक ठरणार आहे.

महायुतीत ही जागा भाजपच्या वाट्याला जाण्याची शक्यता अधिक असल्याने भाजपच्या उमेदवाराची घोषणा आता प्रतिष्ठेचा विषय बनली आहे. दिल्लीतील बैठका, स्थानिक पातळीवरील लॉबिंग, इच्छुकांच्या भेटीगाठी आणि कार्यकर्त्यांची चाचपणी यामुळे वातावरण तापू लागले आहे.

सातारा-सांगली विधान परिषद निवडणूक ही केवळ एक निवडणूक राहिलेली नाही, तर ती प्रतिष्ठा, वर्चस्व आणि आगामी स्थानिक राजकारणाची दिशा ठरवणारी लढाई बनली आहे. त्यामुळे आता भाजपच्या केंद्रीय नेतृत्वाकडून कोणत्या नावाला हिरवा कंदील मिळतो, याचीच सर्वांना प्रतीक्षा लागून राहिली आहे.