gopichand padalkar news : संस्कृततेच्या सीमारेषा ओलांडणारी भाषा भाजपच्या चारित्र्यावर उठलेले प्रश्नचिन्ह : एकेकाळी काँग्रेसचा अभेद्य बालेकिल्ला मानला जाणारा सांगली जिल्हा, ज्याने राजकीय वैचारिक अधिष्ठान, विकासाची दिशा, आणि सुसंस्कृत नेतृत्व याचे जणू प्रतीक निर्माण केले होते, तोच आज भाजप सांगलीत चार आमदारांच्या नेतृत्वात नव्या राजकीय परिभाषेचा अनुभव घेत आहे. भाजपा – जो स्वतःला सुसंस्कृत, राष्ट्रहितासाठी कटिबद्ध, आणि विकासाभिमुख विचारसरणीचा पक्ष म्हणून मिरवतो – त्या पक्षाच्या वर्तणुकीबाबतच आज समाजमनात प्रश्न उभे राहत आहेत.

gopichand padalkar news : संस्कृततेच्या सीमारेषा ओलांडणारी भाषा भाजपच्या चारित्र्यावर उठलेले प्रश्नचिन्ह

ज्या पक्षाने अनेक वर्षांच्या संघर्षानंतर देशाच्या सर्वोच्च सत्तास्थानी आपले स्थान भक्कम केले, ज्याच्या नेत्यांनी संसदेमध्ये किंवा सभास्थळी संयमाने बोलून आदर्श निर्माण केले, तोच पक्ष आज नितेश राणे आणि गोपीचंद पडळकर यांसारख्या वादग्रस्त वक्तव्य करणार्‍या नेत्यांच्या आक्रमक, बेजबाबदार भाषेला कवच पुरवत आहे का?

ज्यांच्या आई-वडिलांवर टीका – ती राजकारण की वैयक्तिक द्वेष?

आ. गोपीचंद पडळकर, जे स्वतःला जनतेचा प्रतिनिधी म्हणवतात, त्यांनी आजवर अनेकदा जयंत पाटील यांच्यावर सडकून टीका केली आहे. पण राजकारणामधील टीका ही केवळ मतभिन्नतेपुरती मर्यादित असावी, ही एक राजकीय सभ्यता असते. मात्र, जेव्हा ही टीका नेत्याच्या आई-वडिलांपर्यंत जाते, तेव्हा ती केवळ असभ्यता नसते, तर ती समाजाच्या सांस्कृतिक पातळीवर केलेला घाला असतो.

जयंत पाटील हे राजारामबापू यांचे सुपुत्र ज्यांनी आपल्या कार्यकर्तृत्वाने केवळ सांगली जिल्हाच नव्हे, तर महाराष्ट्राच्या राजकारणात सुसंस्कृत नेतृत्वाचा आदर्श निर्माण केला. आणि दुसरीकडे वसंतदादा पाटील – एक झुंजार, पण विकासाभिमुख नेते, ज्यांनी मतभेद असूनही कधीही राजकारणात दुश्मनी आणली नाही. त्यांचा परस्पर सहकार्याचा इतिहास मिरज व वाळवा तालुक्याला आजही सुजलाम सुफलाम ठेवणारा आहे.
या पिढ्यानपिढ्या चालत आलेल्या सुसंस्कृतीत राजकारणाच्या नावाखाली अशा पातळीवरील भाषा वापरणे, ही मूल्यांची घसरण नाही का?

भाजपचा दुहेरी चेहरा?

भाजपने देशात हिंदुत्वाच्या रक्षणाचा विडा उचललेला आहे. हिंदू राष्ट्र, रामराज्य, आणि संस्कृतीची पुनर्स्थापना यासारखी घोषणाबाजी करत तो सत्तेत आला. पण आज त्याच पक्षातील काही आमदारांकडून येणारी असभ्य भाषा, वैयक्तिक टीका, आणि जातीय उन्माद हे त्या

सुसंस्कृतीचेच प्रतिबिंब आहे का?

भाजपचे वरिष्ठ नेतृत्व या टीकांवर फक्त औपचारिक प्रतिक्रिया देत आहे. तोडगा निघेल, तपास करू, वक्तव्य वैयक्तिक आहे या नेहमीच्या पोतडीतूनच प्रतिक्रिया दिल्या जात आहेत. पण यातून हा स्पष्ट संकेत मिळतो की, पक्ष या वक्तव्यांपासून दूरी ठेवत नाही, उलट मूक संमती देतो.

जयंत पाटलांची संयमशीलता – एक राजकीय धैर्य

विरोधकांकडून सतत टीका होऊनही जयंत पाटील यांनी आजवर एकही खालच्या स्तरावर उत्तर दिलेले नाही. हे केवळ वैयक्तिक संयमाचे लक्षण नाही, तर ही राजकीय परिपक्वतेची आणि संस्कृतीची ओळख आहे. त्यांच्या विरोधकांना हे अधिक खुपते, म्हणूनच तीव्रतेने आणि वैयक्तिकरित्या हल्ले होत आहेत.

gopichand-padalkar-news-language-that-crosses-the-boundaries-of-sanskritism-raises-question-marks-on-bjps-character

समाजमनाला जागे करणारा क्षण

आज समाजाने विचार केला पाहिजे – आपल्या प्रतिनिधींकडून आपण काय अपेक्षा ठेवतो? काय हीच राजकारणाची भाषा आहे? सत्तेच्या मोहापायी जर वैचारिक शत्रूता वैयक्तिक कटुतेमध्ये परिवर्तित होत असेल, तर मग आपण कोणत्या प्रकारच्या लोकशाहीची अपेक्षा करतो?
समाज हा केवळ मतदानाने नाही, तर संस्काराने घडतो. आणि त्या संस्कारांचं भान राजकारणात राहणं अत्यावश्यक आहे.

भाजपने जर खरंच सुसंस्कृततेचा झेंडा उचललेला असेल, तर तो झेंडा असभ्य वक्तव्यांनी डागाळू नये. पक्षाच्या नावावर जे लोक सतत वाद निर्माण करतात, त्यांनी पातळी गमावली, पण पक्षाने ती उचलून धरली तर संपूर्ण समाजाचा अधःपात अटळ ठरेल.

Author: Rajkiya Live

दिनेशकुमार ऐतवडे रा. समडोली ता. मिरज जि. सांगली हे गेल्या 25 वर्षांपासून पत्रकारिता क्षेत्रात आहेत. Bsc झाल्यानंतर शांतीनिकेतन मधून पत्रकारितेची पदवी घेतली. 1999 मध्ये त्यांनी लोकमत मधून आपल्या कामाला सुरुवात केली. त्यानंतर 1 एप्रिल 2000 ते 20 jully 2020 परेंत तरुण भारत च्या सांगली आवृत्ती मध्ये उपसंपादक पदावर काम केले. सध्या ते दैनिक जनप्रवास मध्ये उपसंपादक म्हणून काम करीत आहेत. राजकारण हा त्यांच्या मुख्य विषय आहे. सांगली, कोल्हापूर, आणि हातकणंगले लोकसभा मतदार संघावर त्यांनी भरपूर लिखाण केले आहे.