samdoli news : समडोळीचा रणसंग्राम : एकतर्फी वाटणारी निवडणूक आता श्वास रोखून पाहावी अशी! : मिरज तालुक्यातील समडोळी जिल्हा परिषद मतदार संघ सध्या राजकीय वर्तुळात चर्चेच्या केंद्रस्थानी आला आहे. सुरुवातीला एकतर्फी वाटणारी ही निवडणूक आता हळूहळू चुरशीच्या, थरारक व रंगतदार लढतीत रूपांतरित होताना दिसत आहे. प्रत्येक दिवसागणिक समीकरणे बदलत आहेत, आणि मतदारांचे मन जिंकण्यासाठी उमेदवारांची धडपड अधिक तीव्र होत चालली आहे.

samdoli news : समडोळीचा रणसंग्राम : एकतर्फी वाटणारी निवडणूक आता श्वास रोखून पाहावी अशी!

या मतदार संघात भाजपकडून हरिपूरचे ज्येष्ठ व अनुभवी नेते अरविंद तांबवेकर मैदानात उतरले आहेत. त्यांच्या विरोधात काँग्रेस आघाडीचे उमेदवार, शेतकरी संघटनेचे ग्रामपंचायत सदस्य दस्तगीर मुजावर यांनी थेट आव्हान उभे केले आहे. अनुभव विरुद्ध नवचैतन्य, सत्ता विरुद्ध संघर्ष – अशी ही लढत आता केवळ निवडणूक न राहता प्रतिष्ठेची लढाई बनली आहे.

समडोळी जिल्हा परिषद मतदार संघात समडोळी, हरिपूर, अंकली, धामणी, जुनी धामणी, बामणी, निलजी आणि ढवळी या गावांचा समावेश असून, समडोळी व अंकली पंचायत समितीचे दोन गण या लढतीला अधिक रंगत देत आहेत. या सर्व गावांतील मतदारांचा कल कुणाकडे झुकतो, यावरच निकालाचे भवितव्य ठरणार आहे.

मागील निवडणुकीत येथे काँग्रेस, राष्ट्रवादी आणि भाजप असा तिरंगी सामना रंगला होता. त्या वेळी केवळ 30 मतांच्या फरकाने भाजपने विजय मिळवत काँग्रेसचा पारंपरिक बालेकिल्ला आपल्या ताब्यात घेतला होता. हा इतिहास आजही मतदारांच्या स्मरणात आहे आणि याच पराभवाची सल काँग्रेस आघाडीला अधिक आक्रमक बनवत आहे.

यंदा परिस्थिती पूर्णपणे बदललेली आहे. काँग्रेस, राष्ट्रवादी आणि शेतकरी संघटना यांची भक्कम आघाडी झाली असून, त्यातून दस्तगीर मुजावर यांना जिल्हा परिषदेसाठी उमेदवारी देण्यात आली आहे. तसेच

समडोळी पंचायत समिती गणातून शोभा अशोक मोहिते,
अंकली पंचायत समिती गणातून सूरज मगदूम

यांना उमेदवारी देण्यात आली आहे. त्यामुळे काँग्रेस आघाडीचे पॅनेल अधिक मजबूत, संघटित आणि आत्मविश्वासपूर्ण दिसत आहे.
दुसरीकडे, भाजपने पुन्हा एकदा अनुभवावर विश्वास ठेवत अरविंद तांबवेकर यांना मैदानात उतरवले आहे. त्यांच्या सोबतीला

अंकली गणातून जनसुराज्यचे कितींकुमार सावळवाडे,
समडोळी गणातून स्वरूपा चव्हाण

यांची उमेदवारी देण्यात आली आहे. भाजपचा हा फॉर्म्युला देखील दुर्लक्षित करता येणार नाही.
या मतदार संघात समडोळी आणि हरिपूर ही गावे निर्णायक ठरणार आहेत. हरिपूरमध्ये तांबवेकर यांना आघाडी मिळण्याची शक्यता असताना, समडोळीमध्ये दस्तगीर मुजावर यांचे पारडे जड असल्याचे चित्र दिसत आहे. मात्र ढवळी आणि धामणी येथील मतदार कुणाच्या बाजूने कौल देतात, यावरच अंतिम निकालाची दिशा ठरणार आहे.

एकंदरीत, समडोळी जिल्हा परिषद मतदार संघातील ही निवडणूक आता श्वास रोखून पाहावी अशी, काट्याच्या लढतीत रूपांतरित झाली आहे. कोण जिंकेल, कोण हरलेल याचा अंदाज बांधणे कठीण झाले असून, मतदारांचा कौलच शेवटी इतिहास घडवणार आहे. समडोळीची ही लढत नक्कीच या निवडणुकीतील सर्वात चुरशीच्या लढतींपैकी एक ठरणार, यात शंका नाही.

Author: Rajkiya Live

दिनेशकुमार ऐतवडे रा. समडोली ता. मिरज जि. सांगली हे गेल्या 25 वर्षांपासून पत्रकारिता क्षेत्रात आहेत. Bsc झाल्यानंतर शांतीनिकेतन मधून पत्रकारितेची पदवी घेतली. 1999 मध्ये त्यांनी लोकमत मधून आपल्या कामाला सुरुवात केली. त्यानंतर 1 एप्रिल 2000 ते 20 jully 2020 परेंत तरुण भारत च्या सांगली आवृत्ती मध्ये उपसंपादक पदावर काम केले. सध्या ते दैनिक जनप्रवास मध्ये उपसंपादक म्हणून काम करीत आहेत. राजकारण हा त्यांच्या मुख्य विषय आहे. सांगली, कोल्हापूर, आणि हातकणंगले लोकसभा मतदार संघावर त्यांनी भरपूर लिखाण केले आहे.