shaktipith : “दररोज नवा मार्ग, नवी दिशा आणि नवे कारण पुढे करून ५० हजार कोटींचा ढपला पाडण्याचा कट : राज्यातील शक्तीपीठ महामार्गाचा विषय पुन्हा एकदा राजकीय रणधुमाळीत केंद्रस्थानी आला असून, या महामार्गामागे विकास नव्हे तर भ्रष्ट अर्थकारणाची काळी छाया असल्याचा गंभीर आरोप स्वाभिमानी शेतकरी संघटनेचे संस्थापक राजू शेट्टी यांनी केला आहे.
shaktipith : “दररोज नवा मार्ग, नवी दिशा आणि नवे कारण पुढे करून ५० हजार कोटींचा ढपला पाडण्याचा कट
शक्तीपीठ महामार्ग : जनतेच्या खिशातून ठेकेदारांची तिजोरी भरण्याचा कट?
“दररोज नवा मार्ग, नवी दिशा आणि नवे कारण पुढे करून तब्बल ५० हजार कोटींचा ढपला पाडण्याचा कट मुख्यमंत्री देवेंद्र फडणवीस रचत आहेत,” असा सणसणीत हल्ला त्यांनी चढवला आहे.
राज्यात सर्वत्र शक्तीपीठ महामार्गाला शेतकरी, ग्रामस्थ आणि सामान्य जनतेचा कडाडून विरोध असताना, तरीही हा महामार्ग रेटण्यासाठी सत्ताधाऱ्यांची धडपड सुरू आहे. जिथे जिथे जमीन मोजणीसाठी अधिकारी गेले, तिथे शेतकऱ्यांनी दार बंद ठेवले, मोजणी होऊ दिली नाही. तरीही सरकारचे डोळे उघडत नाहीत, हेच आश्चर्यकारक आहे.
राजू शेट्टी यांच्या आरोपानुसार, लोकसभा व विधानसभा निवडणुकांच्या काळात बड्या बांधकाम कंपन्यांकडून आगाऊ रक्कम उचलण्यात आली. निविदा देण्याचे आमिष दाखवून निवडणुकीचा खर्च भागवला गेला. मात्र आता राज्याच्या तिजोरीत पैसा नसल्याने, त्या ठेकेदारांना परतफेड करण्यासाठी कधी संरेखन बदल, कधी नवीन मार्ग, अशा क्लृप्त्या लढवल्या जात आहेत.
नागपूर अधिवेशनाच्या शेवटच्या दिवशी मुख्यमंत्र्यांनी सांगली व कोल्हापूर जिल्ह्यातील मार्ग बदलण्याचे संकेत दिले, मात्र “शक्तीपीठ महामार्ग होणारच,” असा हट्ट विधानसभेतून जाहीर केला. हा हट्ट म्हणजे जनतेच्या विरोधावर मात करण्याचा सत्तेचा अहंकार असल्याचे टीकाकार सांगत आहेत.
रत्नागिरी ते नागपूर असा राष्ट्रीय महामार्ग आधीच अस्तित्वात असताना, त्याला समांतर शक्तीपीठ महामार्ग उभारणे म्हणजे राज्याच्या माथी १ लाख कोटी रुपयांचे कर्ज बसवण्यासारखे आहे. आजही विद्यमान महामार्गावर अपेक्षित टोलवसुली होत नाही, रस्ता तोट्यात चालतो. अशा परिस्थितीत नवीन महामार्ग उभारल्यास, दोन्ही रस्ते कर्जाच्या खाईत लोटले जातील, असा इशारा शेट्टी यांनी दिला.
“विकासाच्या नावाखाली कर्जाचा डोंगर उभा करून, त्यातून ठेकेदारांची तिजोरी भरायची आणि जनतेला टोलच्या जाचात अडकवायचे—हा डाव आम्ही यशस्वी होऊ देणार नाही,” असा स्पष्ट इशाराही त्यांनी दिला.
राज्यात सर्वत्र विरोध, शेतकऱ्यांचा संताप, ग्रामसभांचा नकार आणि तरीही सरकारचा हट्ट—यामुळे मुख्यमंत्री दिशाहीन झाले असून संशयाच्या भोवऱ्यात सापडले आहेत, अशी तीव्र टीका राजू शेट्टी यांनी केली आहे.
शक्तीपीठ महामार्ग हा आता केवळ रस्ता राहिलेला नाही, तर तो राज्याच्या अर्थकारणावर आणि सत्तेच्या नैतिकतेवर प्रश्नचिन्ह उभे करणारा विषय ठरला आहे.
जनतेचा आवाज दाबून, कर्जाच्या जोरावर सत्ता चालवण्याचा हा प्रयत्न महाराष्ट्र सहन करणार का, हाच खरा प्रश्न आज उभा आहे.
Author: Rajkiya Live
दिनेशकुमार ऐतवडे रा. समडोली ता. मिरज जि. सांगली हे गेल्या 25 वर्षांपासून पत्रकारिता क्षेत्रात आहेत. Bsc झाल्यानंतर शांतीनिकेतन मधून पत्रकारितेची पदवी घेतली. 1999 मध्ये त्यांनी लोकमत मधून आपल्या कामाला सुरुवात केली. त्यानंतर 1 एप्रिल 2000 ते 20 jully 2020 परेंत तरुण भारत च्या सांगली आवृत्ती मध्ये उपसंपादक पदावर काम केले. सध्या ते दैनिक जनप्रवास मध्ये उपसंपादक म्हणून काम करीत आहेत. राजकारण हा त्यांच्या मुख्य विषय आहे. सांगली, कोल्हापूर, आणि हातकणंगले लोकसभा मतदार संघावर त्यांनी भरपूर लिखाण केले आहे.
