sangli-satara election news : शेखर गोरे यांची जोरदार तयारी; राजकीय वातावरण तापले : सांगली-सातारा स्थानिक स्वराज्य संस्थेच्या निवडणुकीची रणधुमाळी अखेर अधिकृतपणे सुरू झाली आणि राजकीय वर्तुळात नव्या समीकरणांचे वारे वाहू लागले आहेत. अनेक वर्षांच्या प्रतीक्षेनंतर जाहीर झालेल्या या निवडणुकीने दोन्ही जिल्ह्यांतील राजकीय नेत्यांच्या हालचालींना अचानक वेग दिला आहे. गल्लीपासून दिल्लीपर्यंत चर्चेचा विषय ठरलेल्या या निवडणुकीत आता प्रत्येक पक्ष आपापली ताकद आजमावण्याच्या तयारीत आहे.

sangli-satara election news : शेखर गोरे यांची जोरदार तयारी; राजकीय वातावरण तापले

भाजपकडून ग्रामविकासमंत्री जयकुमार गोरे यांचे बंधू शेखर गोरे यांनी मैदानात उतरायची जवळपास तयारी पूर्ण केली आहे. त्यांच्या दावेदारीकडे आता केवळ पक्षांतर्गत नव्हे तर संपूर्ण राजकीय वर्तुळाचे लक्ष लागले आहे. गेल्या निवडणुकीतील पराभवाची सल मनात ठेवून यावेळी ते अधिक ताकदीने, अधिक आक्रमक रणनीतीसह मैदानात उतरणार असल्याचे चित्र दिसत आहे. विशेष म्हणजे त्यांच्याविरोधात अद्याप कोणताही ठोस प्रतिस्पर्धी पुढे आलेला नाही. त्यामुळे भाजपमध्ये त्यांच्या उमेदवारीला जवळपास शिक्कामोर्तब झाल्याची चर्चा रंगू लागली आहे.

तरीही भाजपच्या गोटात अनेक नावांची कुजबुज सुरू आहे. सांगली जिल्ह्यातून पृथ्वीराज देशमुख, सम्राट महाडिक, नीता केळकर आणि वैभव पाटील यांची नावे चर्चेत आहेत. तर काँग्रेसकडून महेंद्र लाड यांचे नाव पुढे येत आहे. मात्र ही केवळ नावे नसून, या निवडणुकीतील भावी राजकीय संघर्षाची बीजे मानली जात आहेत.

या निवडणुकीचे वैशिष्ट्य म्हणजे महायुती आणि महाविकास आघाडीतील अंतर्गत तणाव. सांगली आणि सातारा जिल्हा परिषद निवडणुकांमध्ये महायुतीत निर्माण झालेल्या बिघाडीचे पडसाद आता पुन्हा उमटण्याची शक्यता राजकीय निरीक्षक व्यक्त करत आहेत. त्या संघर्षाच्या जखमा अद्याप भरलेल्या नाहीत. म्हणूनच राष्ट्रवादी काँग्रेस (अजितदादा गट) आणि शिवसेना (शिंदे गट) यांनी सध्या सावध भूमिका घेतली आहे. प्रत्येक पाऊल मोजून टाकण्याचा प्रयत्न सुरू आहे.

दुसरीकडे महाविकास आघाडीतील चित्रही फारसे उत्साहवर्धक नाही. काँग्रेस, राष्ट्रवादी काँग्रेस शरद पवार गट आणि उद्धव ठाकरे यांची शिवसेना या तिन्ही पक्षांमध्ये सध्या कमालीची शांतता आहे. कारण या मतदारसंघातील त्यांची ताकद मर्यादित असल्याचे वास्तव त्यांनाही मान्य करावे लागत आहे.

२०१६ मध्ये झालेल्या निवडणुकीत काँग्रेसचे मोहनराव कदम विजयी झाले होते. त्या वेळी काँग्रेस आणि राष्ट्रवादी काँग्रेसचे या मतदारसंघावर निर्विवाद वर्चस्व होते. भाजपची ताकद मर्यादित होती. पण गेल्या दहा वर्षांत राजकारणाने अनेक कलाटण्या घेतल्या. राज्यातील बदलती सत्ता, पक्षांतील फूट, नवीन नेतृत्वाचा उदय आणि स्थानिक स्वराज्य संस्थांतील राजकीय गणिते यामुळे या मतदारसंघाचा चेहरामोहराच बदलून गेला आहे.

ओबीसी आरक्षण आणि प्रभाग रचनेच्या वादामुळे राज्यातील स्थानिक स्वराज्य संस्थांच्या निवडणुका रखडल्या आणि त्यामुळे ही निवडणूक तब्बल साडेतीन वर्षे लांबणीवर पडली. आता नवीन सभागृह अस्तित्वात आल्यानंतर अखेर या निवडणुकीचा मार्ग मोकळा झाला आहे. १८ जून रोजी मतदान होणार असून त्यासाठी दोन्ही जिल्ह्यांतील राजकीय वातावरण तापू लागले आहे.

आजच्या घडीला सांगली-सातारा मतदारसंघात ताकदीचे गणित मांडले तर भाजप सर्वात मजबूत पक्ष म्हणून पुढे दिसतो. दुसऱ्या क्रमांकावर राष्ट्रवादी काँग्रेसचा अजितदादा गट आहे. शिवसेनेनेही गेल्या काही वर्षांत सांगली आणि साताऱ्यात आपली ताकद वाढवली आहे. तर शरद पवार गटाची राष्ट्रवादी चौथ्या स्थानावर असल्याचे चित्र आहे. काँग्रेसची अवस्था मात्र सर्वाधिक चिंताजनक मानली जात आहे. एकेकाळी या भागावर प्रभाव असलेला पक्ष आता राजकीय अस्तित्व टिकवण्याच्या लढाईत असल्याचे चित्र निर्माण झाले आहे.

यामुळेच यावेळची निवडणूक “महायुती विरुद्ध महाविकास आघाडी” अशी सरळसोट होईल, असे चित्र सध्या तरी दिसत नाही. उलट महायुतीतच संघर्षाची ठिणगी पडण्याची शक्यता अधिक आहे. भाजप या जागेवर ठाम दावा करणार हे जवळपास निश्चित मानले जात आहे. पण राष्ट्रवादी काँग्रेस (अजितदादा गट) ही जागा मागण्याची शक्यता नाकारता येत नाही. त्यांच्याकडे सध्या तुल्यबळ उमेदवार नसला तरी निवडणुकीच्या तोंडावर समीकरणे बदलू शकतात. शिवसेना (शिंदे गट) देखील आपली ताकद दाखवण्यासाठी मैदानात उतरू शकते.

या संघर्षामागे जुन्या राजकीय जखमाही आहेत. सांगली जिल्हा परिषदेत सत्ता स्थापनेवेळी राष्ट्रवादी काँग्रेसने भाजपची साथ सोडल्याने भाजपला विरोधी बाकांवर बसावे लागले होते. तर सातारा जिल्हा परिषदेत भाजपविरोधात राष्ट्रवादी आणि शिवसेनेने हातमिळवणी करत सत्ता रोखण्याचा प्रयत्न केला होता. त्या वेळी निर्माण झालेला संघर्ष इतका टोकाला गेला होता की शिंदेसेनेचे नेते व पालकमंत्री शंभूराज देसाई आणि राष्ट्रवादीचे मंत्री मकरंद पाटील यांच्यात धक्काबुक्कीपर्यंत परिस्थिती पोहोचली होती. त्या घटनेच्या आठवणी आजही राजकीय वर्तुळात ताज्याच आहेत.

म्हणूनच या निवडणुकीत वरवर शांतता दिसत असली तरी आतून संघर्षाची धग पेटलेली आहे. प्रत्येक पक्ष योग्य संधीची वाट पाहत आहे.

सांगली जिल्ह्यात शरद पवार गटाची ताकद असली तरी साताऱ्यात त्यांची सदस्यसंख्या मर्यादित आहे. काँग्रेसलाही दोन्ही जिल्ह्यांत स्वतंत्रपणे दमदार लढत देणे कठीण जात आहे. त्यामुळे जर महायुतीतील संघर्ष अधिक वाढला, तर भाजपला रोखण्यासाठी सर्व विरोधी पक्ष एकत्र येण्याची शक्यता नाकारता येत नाही.

आणि जर तसे झाले… तर ही निवडणूक केवळ एक राजकीय लढत राहणार नाही, तर प्रतिष्ठेची, अहंकाराची आणि अस्तित्वाची अटीतटीची झुंज ठरणार आहे. अन्यथा, विरोधकांतील विस्कळीतपणा आणि भाजपची वाढती ताकद पाहता, सांगली-सातारा स्थानिक स्वराज्य संस्थेच्या या रणांगणावर भाजपचा एकतर्फी विजय होण्याची शक्यता राजकीय वर्तुळात जोरदारपणे व्यक्त केली जात आहे.

Author: Rajkiya Live

दिनेशकुमार ऐतवडे रा. समडोली ता. मिरज जि. सांगली हे गेल्या 25 वर्षांपासून पत्रकारिता क्षेत्रात आहेत. Bsc झाल्यानंतर शांतीनिकेतन मधून पत्रकारितेची पदवी घेतली. 1999 मध्ये त्यांनी लोकमत मधून आपल्या कामाला सुरुवात केली. त्यानंतर 1 एप्रिल 2000 ते 20 jully 2020 परेंत तरुण भारत च्या सांगली आवृत्ती मध्ये उपसंपादक पदावर काम केले. सध्या ते दैनिक जनप्रवास मध्ये उपसंपादक म्हणून काम करीत आहेत. राजकारण हा त्यांच्या मुख्य विषय आहे. सांगली, कोल्हापूर, आणि हातकणंगले लोकसभा मतदार संघावर त्यांनी भरपूर लिखाण केले आहे.