sangli -satara news : 438 पैकी 222 जागांवर भाजपचे वर्चस्व; कार्यकर्त्यांत उत्साह  : सातारा-सांगलीच्या राजकारणात पुन्हा एकदा सत्तेच्या समीकरणांची धग वाढू लागली आहे. स्थानिक स्वराज्य संस्थांच्या निवडणुकांची चाहूल लागताच इच्छुकांनी गाठीभेटी, बैठका आणि शक्तिप्रदर्शनाला सुरुवात केली असून, आगामी राजकीय रणधुमाळीची रंगीत तालीम सुरू झाली आहे. मात्र यंदाची निवडणूक केवळ उमेदवारांची नाही, तर महायुती टिकणार की तुटणार, याचीही निर्णायक कसोटी ठरणार असल्याचे चित्र दिसत आहे.

sangli -satara news : 438 पैकी 222 जागांवर भाजपचे वर्चस्व; कार्यकर्त्यांत उत्साह

सातारा जिल्ह्यात भाजपने मागील काही वर्षांत संघटनात्मक ताकद प्रचंड वाढवली आहे. जिल्हा परिषद, नगरपालिका, पंचायत समित्या आणि नगरपंचायतींमध्ये मिळून 438 पैकी तब्बल 222 जागांवर भगवा फडकवत भाजपने आपले वर्चस्व सिद्ध केले आहे. शिवाय अनेक अपक्ष सदस्यही आपल्या पाठीशी असल्याचा दावा भाजप नेते करत आहेत.

त्यामुळे उमेदवारीवर सातार्‍याचाच पहिला हक्क अशी भावना भाजपच्या कार्यकर्त्यांत आणि नेत्यांत प्रबळ झाली आहे. कार्यकर्त्यांनी वर्षानुवर्षे केलेल्या मेहनतीला आता न्याय मिळालाच पाहिजे, असा सूर जिल्ह्यात उमटू लागला आहे.

मात्र दुसरीकडे सांगली जिल्ह्यातील राजकीय गणित भाजपसाठी इतके सोपे नाही. येथे राष्ट्रवादी काँग्रेस आणि शिंदेसेनेकडे लक्षणीय संख्याबळ असून, महायुतीत जागावाटपावरून तणाव निर्माण होण्याची चिन्हे स्पष्ट दिसत आहेत. विधानसभेत एकत्र आलेले मित्रपक्ष स्थानिक पातळीवर पुन्हा एकदा आमनेसामने उभे ठाकणार का, हा सध्या सर्वात मोठा प्रश्न बनला आहे.

कारण मागील स्थानिक निवडणुकांमध्ये भाजपविरोधात राष्ट्रवादी आणि शिंदेसेना स्वतंत्रपणे लढले होते. त्या संघर्षाची ठिणगी अजूनही पूर्णपणे विझलेली नसल्याचे राजकीय वातावरणातून जाणवत आहे.

जर महायुतीत तडा गेला, तर भाजपसमोर कडवे आणि थेट आव्हान उभे राहू शकते. सांगलीतील राष्ट्रवादी आणि शिंदेसेनेची ताकद, त्याला सातार्‍यातील स्थानिक समीकरणांची जोड, आणि त्यात महाविकास आघाडीने एकत्रितपणे ताकद लावली, तर ही निवडणूक अत्यंत चुरशीची आणि रंगतदार होण्याची शक्यता आहे. त्यामुळे आगामी काही दिवसांत होणार्‍या बैठका, गाठीभेटी आणि पडद्यामागील हालचालींकडे संपूर्ण राज्याचे लक्ष लागले आहे.

दरम्यान, भाजपमधून धैर्यशील कदम आणि सुनील काटकर यांची नावे जोरदार चर्चेत आली आहेत. दोघेही आपापल्या परीने कार्यकर्त्यांशी संपर्क वाढवत असून, राजकीय वातावरण तापवू लागले आहेत. शिंदेसेनेकडून पालकमंत्री शंभूराज देसाई आणि आमदार महेश शिंदे यांच्यात नेमके कोणाचे पारडे जड ठरणार, याबाबतही राजकीय वर्तुळात उत्सुकता वाढली आहे. पक्षांतर्गत एकमत होणार की मतभेद उफाळून येणार, यावर अनेक समीकरणे अवलंबून आहेत.

दुसरीकडे महाविकास आघाडीतही हालचाली वेगाने सुरू झाल्या आहेत. पुढील आठवड्यात होणार्‍या बैठकीत काँग्रेस की राष्ट्रवादी, यापैकी कोणाला उमेदवारी द्यायची यावर निर्णायक चर्चा होण्याची शक्यता आहे. या मतदारसंघातून गतवेळी काँग्रेसचे मोहनराव कदम विजयी झाले होते.

त्यामुळे यंदाही काँग्रेस दावा ठोकणार का, याची उत्सुकता शिगेला पोहोचली आहे. आमदार विश्वजीत कदम आणि माजी मुख्यमंत्री पृथ्वीराज चव्हाण नेमकी कोणती भूमिका घेणार, याकडे काँग्रेस कार्यकर्त्यांसह संपूर्ण राज्याचे लक्ष लागले आहे.

सत्तेच्या या राजकीय पटावर आता प्रत्येक चाल महत्त्वाची ठरणार आहे. मैत्री टिकवायची की स्वतंत्र शक्तिप्रदर्शन करायचे, याचा निर्णयच आगामी निवडणुकीचे भवितव्य ठरवणार आहे. सातारा-सांगलीच्या राजकारणात पुढील काही दिवसांत घडणार्‍या घडामोडी राज्याच्या राजकीय समीकरणांना नवे वळण देणार, हे मात्र निश्चित!

Author: Rajkiya Live

दिनेशकुमार ऐतवडे रा. समडोली ता. मिरज जि. सांगली हे गेल्या 25 वर्षांपासून पत्रकारिता क्षेत्रात आहेत. Bsc झाल्यानंतर शांतीनिकेतन मधून पत्रकारितेची पदवी घेतली. 1999 मध्ये त्यांनी लोकमत मधून आपल्या कामाला सुरुवात केली. त्यानंतर 1 एप्रिल 2000 ते 20 jully 2020 परेंत तरुण भारत च्या सांगली आवृत्ती मध्ये उपसंपादक पदावर काम केले. सध्या ते दैनिक जनप्रवास मध्ये उपसंपादक म्हणून काम करीत आहेत. राजकारण हा त्यांच्या मुख्य विषय आहे. सांगली, कोल्हापूर, आणि हातकणंगले लोकसभा मतदार संघावर त्यांनी भरपूर लिखाण केले आहे.