tasgaon sanjaykaka news : औताला जुंपलेली निष्ठा, आणि हृदयाला भिडणारी भेट…: तासगावचा रस्ता त्या दिवशी केवळ आंदोलकांनी नव्हे, तर जिवंत निष्ठेच्या, निःस्वार्थ प्रेमाच्या आणि मातीशी असलेल्या अतूट नात्याच्या एका अद्वितीय दृश्याने भारावून गेला. निमणी गावचा श्याम उर्फ अथर्व राजमाने — वयाने युवक, पण कणखरतेने आणि निष्ठेने संपूर्ण पिढीचा प्रतिनिधी!
tasgaon sanjaykaka news : औताला जुंपलेली निष्ठा, आणि हृदयाला भिडणारी भेट…
शेतकऱ्याच्या व्यथा जाणणारा, स्वाभिमानाचा झेंडा उंचावणारा — औताला स्वतःला जुंपणारा निष्ठावान कार्यकर्ता!
शेतकऱ्यांच्या हक्कांसाठी संजय काका पाटील यांनी पुकारलेल्या चक्काजाम आंदोलनात सहभागी होण्यासाठी श्यामने जे केलं, ते पाहून अनेकांच्या डोळ्यांत अश्रू तरळले. हा केवळ आंदोलन नव्हतं, ही होती श्रद्धा. निष्ठेचा हा जिवंत झेंडा होता, जो स्वतःला आपल्या एकुलत्या एक बैलासोबत औताला जुंपून, पाच किलोमीटरचा प्रवास पायी करत, रणरणत्या उन्हात तासगावच्या आंदोलनात सामील झाला!
हा प्रसंग पाहणाऱ्यांचं काळीज हेलावून गेलं. त्याचा तो फोटो, तो व्हिडीओ क्षणार्धात समाजमाध्यमांवर झळकला, आणि शेकडो हृदयांना सळसळवून गेला. आजच्या हिशोबी, स्वार्थी जगात ही होती एका निष्कलंक निष्ठेची साक्ष.
निष्ठेचं हे बीज पेरलं गेलं होतं वर्ष २००७ मध्ये…
संजय काकांनी आमदारकीच्या रूपाने पहिलं यश मिळवलं, तेव्हा श्यामच्या घरात आनंदाचा जल्लोष झाला होता. त्याचे आजोबा, गावातले जुने कार्यकर्ते, त्यांच्या पावलावर पाऊल टाकत श्याम हाही त्या विजयाच्या रंगात न्हाऊन निघाला.
तेव्हापासून आजतागायत, कोणतीही निवडणूक असो, कोणतंही आंदोलन असो, कोणतंही संकट असो — श्यामचा आवाज नेहमीच संजय काकांच्या पाठीशी उभा राहिलेला दिसतो.
औताला जुंपलेली निष्ठा, आणि हृदयाला भिडणारी भेट…
त्याच्या या अद्वितीय समर्पणाची दखल घेणं हे कोणत्याही संवेदनशील मनाचं कर्तव्यच होतं.
शुक्रवारी वसुबारस — या दिवसाचं एक वेगळंच महत्व असतं. गाई-बैलांचं पूजन, आपुलकीचं प्रतीक.
याच शुभमुहूर्तावर, संजय काका पाटील आणि युवकनेते प्रभाकर बाबा पाटील यांनी श्यामला दिली अशी भेट, की ज्यात केवळ बैल नव्हता — त्यात होता विश्वास, प्रेम आणि कृतज्ञतेचा स्पर्श.
प्रभाकर बाबांनी स्वतः निमणी गावी जाऊन, श्यामच्या अंगणात एक देखणा बैल भेट म्हणून उभा केला. श्यामच्या डोळ्यांतून त्या क्षणी वाहणारे अश्रू केवळ आनंदाचे नव्हते, ते होते आपल्या निष्ठेला मिळालेल्या मान्यतेचे. ते अश्रू होते की, “मी एकटा नाही, माझ्या पाठीशी माझे नेते उभे आहेत,” हे जाणवून देणारे!
ही होती केवळ भेट नाही — हा होता निष्ठेचा सन्मान.
प्रत्येकाच्या नशिबी असं काही घडत नाही. पण ज्याच्या नशिबात असतं, त्याने त्यासाठी समर्पणाचं बीज मनात पेरलेलं असावं लागतं. श्यामने ते बीज लावलं, त्याला प्रेमाने पाणी दिलं आणि आता त्याचा हा वृक्ष झालाय — संपूर्ण समाजाला सावली देणारा!
आज जेव्हा पद, पैसा, सत्ता यांच्या मागे लोक धावत असतात, तेव्हा श्यामसारखा कार्यकर्ता आपल्या कृतीतून सांगतो – “खरी निष्ठा ही झुकत नाही, ती उगम धरते आणि आपल्या पायावर चालत यशाच्या शिखरावर पोहोचते!”
Author: Rajkiya Live
दिनेशकुमार ऐतवडे रा. समडोली ता. मिरज जि. सांगली हे गेल्या 25 वर्षांपासून पत्रकारिता क्षेत्रात आहेत. Bsc झाल्यानंतर शांतीनिकेतन मधून पत्रकारितेची पदवी घेतली. 1999 मध्ये त्यांनी लोकमत मधून आपल्या कामाला सुरुवात केली. त्यानंतर 1 एप्रिल 2000 ते 20 jully 2020 परेंत तरुण भारत च्या सांगली आवृत्ती मध्ये उपसंपादक पदावर काम केले. सध्या ते दैनिक जनप्रवास मध्ये उपसंपादक म्हणून काम करीत आहेत. राजकारण हा त्यांच्या मुख्य विषय आहे. सांगली, कोल्हापूर, आणि हातकणंगले लोकसभा मतदार संघावर त्यांनी भरपूर लिखाण केले आहे.
